٣٧٢٨: عبیداللہ بن عیاض بن عبداللہ نے ابو سعید انصاری (رض) سے نقل کیا کہ جناب رسول اللہ (صلی اللہ علیہ وآلہ وسلم) نے ابو قتادہ انصاری (رض) کو صدقات پر عامل مقرر فرمایا۔ آپ (صلی اللہ علیہ وآلہ وسلم) اور صحابہ کرام احرام باندھ کر روانہ ہوئے۔ یہاں تک کہ مقام عسفان میں پہنچ گئے اچانک ایک وحشی گدھا سامنے آیا۔ ابو سعید کہتے ہیں کہ ابو قتادہ (رض) آئے وہ غیر محرم تھے صحابہ کرام نے شکار کی طرف نگاہ دوڑانے سے اپنی نگاہیں ہٹالیں کہ ابو قتادہ کو خبر کا ذریعہ نہ بنے۔ ابو قتادہ تو شکار کو پہلے دیکھ چکے تھے وہ اپنے گھوڑے پر سوار ہوئے اور اپنا نیزہ لیا وہ گرپڑا انھوں نے کہا مجھے پکڑا دو ۔ انھوں نے کہا ہم اس سلسلہ میں تیری کوئی مدد کرنے والے نہیں انھوں نے شکار پر حملہ کر کے اس کو شکار کرلیا بعض اس میں سے گوشت لے کر بھوننے لگے۔ پھر کہنے لگے ہمارے درمیان جناب رسول اللہ (صلی اللہ علیہ وآلہ وسلم) موجود ہیں۔ اور آپ (صلی اللہ علیہ وآلہ وسلم) ان سے کچھ آگے بڑھ گئے تھے وہ آپ (صلی اللہ علیہ وآلہ وسلم) سے جا ملے اور آپ (صلی اللہ علیہ وآلہ وسلم) سے اس کے متعلق دریافت کیا آپ (صلی اللہ علیہ وآلہ وسلم) نے اس میں کوئی حرج قرار نہ دیا۔
تخریج : بخاری فی الصید باب ٢‘ مسلم فی الحج ٥٦۔
حاصل روایات : حضرت ابو قتادہ (رض) کو عامل مقرر فرمایا تھا وہ اس علاقہ کی طرف جا رہے تھے اور راستہ اکٹھا تھا یا عمرۃ القضاۃ کے موقعہ پر آپ (صلی اللہ علیہ وآلہ وسلم) نے خود دشمنوں کی شرارتوں کے خطرے کے پیش نظر ان کو اس بات کی نگرانی پر مقرر کیا تھا۔ مسلم جلد ایک کی روایت سے عمرۃ الحدیبیہ کا واقعہ لگتا ہے واللہ اعلم۔