٣٧٢٧: لیث نے ابن الہاد سے پھر اس نے اپنی سند سے روایت نقل کی ہے۔ حضرت طلحہ اور عمیر بن سلمہ (رض) کی وہ روایت جو انھوں نے جناب رسول اللہ (صلی اللہ علیہ وآلہ وسلم) سے نقل کی اس میں محرم کے لیے شکار کے گوشت کا کھانا حلال قرار دیا گیا جس شکار کو کسی حلال نے کیا ہو اور یہ روایت حضرت علی ‘ زید بن ارقم اور صعب بن جثامہ (رض) کی ان روایات کے خلاف ہے جو انھوں نے جناب رسول اللہ (صلی اللہ علیہ وآلہ وسلم) سے نقل کی ہیں البتہ روایت طلحہ اور عمیربن سلمہ (رض) میں اس بات کا کوئی حکم موجود نہیں جب کہ کوئی شکار غیرمحرم نے محرم کی نیت سے کیا ہو ۔ پس اس میں ہم نے جانچ پڑتال کی تو یہ روایات مل گئیں جو ذیل میں درج ہیں۔
حاصل روایات : طلحہ اور عمیر بن سلمہ (رض) کی روایات میں اتنی بات ثابت ہوچکی ہے کہ حلال کا کیا ہوا شکار محرم کو کھانے کی اجازت مرحمت فرمائی۔ اور یہ روایتیں حضرت ‘ زید بن ارقم اور صعب بن جثامہ (رض) کی روایات کے خلاف ہیں۔ البتہ اس بات کی دلیل چاہیے کہ اگر حلال محرم کا ارادہ کر کے شکار کرے تو وہ اس کے لیے حلال ہوگا یا نہیں۔ چنانچہ آئندہ سطور میں ہم اس کی دلیل پیش کریں گے۔