٣٧٣٢: عطاء بن یسار نے ابی قتادہ (رض) سے اسی طرح کی روایت کی ہے اور اس میں یہ اضافہ ہے کہ جناب رسول اللہ (صلی اللہ علیہ وآلہ وسلم) نے فرمایا کیا تمہارے پاس اس کا کچھ گوشت موجود ہے ؟ ہم جان چکے تھے کہ ابو قتادہ (رض) نے ایسے وقت میں فقط آپ کے لیے شکار نہیں کیا بلکہ آپ (صلی اللہ علیہ وآلہ وسلم) اور آپ کے ان اصحاب (رض) کے لیے کیا جو آپ کے ساتھ تھے۔ تو جناب رسول اللہ (صلی اللہ علیہ وآلہ وسلم) نے اس شکار کو اپنے اور اپنے اصحاب کے لیے مباح قرار دیا اور ابو قتادہ کے اس ارادہ کی وجہ سے کہ یہ آپ اور آپ کے اصحاب کے لیے ہوگا آپ نے اس کو حرام قرار نہیں دیا اور عثمان بن عبداللہ کی روایت میں یہ لفط ہیں ( اشرتم او صدتم او قتلتم قالوا لا قال فکلوا) کیا تم نے شکار کے لیے اشارہ کیا یا خود شکار کیا یا تم نے شکار خود قتل کیا تو انھوں نے کہا نہیں آپ نے فرمایا اسے کھاؤ اس سے یہ دلالت میسر آئی کہ ان کے لیے حرام اس وقت ہوگا جب کہ وہ ان مذکورہ بالا چیزوں میں سے کوئی ایک کریں ۔ اس کے علاوہ وہ شکار ان کے لیے حرام نہ ہوگا ۔ اس میں اس بات کی دلیل ہے کہ جناب رسول اللہ (صلی اللہ علیہ وآلہ وسلم) کے اس ارشاد کا مطلب جو حدیث عمرو مولیٰ مطلب میں آیا ہے (اویصا دلکم) کہ اس سے محرم کے حکم سے شکار کرنا مراد ہے۔ آثار کو سامنے رکھتے ہوئے اس باب کا یہی حکم ہے اور حضرت عمر (رض) کا بھی یہی قول ہے۔
تخریج : مسلم فی الحج ٣٣۔ حاصل روایات : آپ (صلی اللہ علیہ وآلہ وسلم) نے یہ شکار اپنے اور ان کے لیے مباح قرار دیا اور ان پر حرام قرار نہیں دیا باوجودیکہ حضرت ابو قتادہ (رض) نے عبداللہ بن موہب کی روایت میں تو یہ بھی ہے کہ جناب رسول اللہ (صلی اللہ علیہ وآلہ وسلم) نے ان سے دریافت کیا کہ کیا تم نے شکار کی طرف اشارہ کیا ‘ شکار کیا یا شکار کو قتل کیا ؟ انھوں نے نفی میں جواب دیا تو آپ (صلی اللہ علیہ وآلہ وسلم) نے فرمایا پس اس کو کھاؤ۔ اس سے یہ بات ثابت ہوئی کہ ان پر حرام ہونے کی صورت یہ ہے کہ جب وہ ان تینوں کاموں میں سے کسی ایک کا ارتکاب کریں اس کے علاوہ ان پر حرام نہ ہوگا۔
اس میں یہ دلیل مل گئی کہ جناب رسول اللہ (صلی اللہ علیہ وآلہ وسلم) کے ارشاد کا مطلب جو کہ روایت عمرو مولیٰ المطلب میں موجود ” اویصادلکم “ یعنی ان کے کہنے پر ان کے لیے شکار کیا گیا ہو۔
آثار مرویہ کے لحاظ سے تو یہی مفہوم ہوگا اس قول کو حضرت عمر (رض) نے بھی اختیار فرمایا ہے۔