٣٧٣٨: عبداللہ بن حارث (رض) نے اپنے والد سے بیان کیا کہ ہم عثمان و علی (رض) کے ساتھ تھے جب ہم فلاں فلاں مقام پر پہنچے تو ان کے سامنے کھانا پیش کیا گیا۔ عبداللہ کہتے ہیں میں نے ایک بڑا پیالہ دیکھا گویا اس کا منظر اب بھی میرے سامنے ہے کہ نرچکوروں کی ایڑیاں نظر آرہی ہیں۔ جب علی (رض) نے یہ حال دیکھا تو اٹھ کھڑے ہوئے۔ ان کے ساتھ تھوڑے سے لوگ اٹھ گئے ان سے کہا گیا اللہ کی قسم ہم نے نہ اشارہ کیا اور نہ ہم نے شکار کیا حضرت عثمان (رض) کو کہا گیا کہ یہ لوگ تمہارے کھانے سے نفرت کی وجہ سے اٹھ گئے ہیں۔ حضرت عثمان (رض) نے ان کو بلا بھیجا اور پوچھا آپ نے کھانے میں سے کون سی چیز ناپسند کی ؟ تو علی (رض) نے فرمایا۔ اللہ تعالیٰ نے فرمایا : احل لکم صیدالبحر وطعامہ الی حرم علیکم صیدالبر مادمتم حرما (المائدہ : ٩٦) یہ آیت پڑھ کر چلے گئے۔ اس سے معلوم ہوا کہ علی (رض) کے ہاں محرم پر شکار کا گوشت بہرصورت حرام تھا۔ ان کے جواب میں کہا جائے گا ۔ کہ ان کی اس رائے کے خلاف حضرت عمر طلحہ ‘ عائشہ صدیقہ ‘ ابوہریرہ (رض) ہیں اور جناب رسول اللہ (صلی اللہ علیہ وآلہ وسلم) سے کثرت سے روایات وارد ہوئی ہیں جو ان حضرات کے قول کے موافق ہیں۔ رہی آیت و حرم علیکم صید البر مادمتم حرمًا) اس میں احتمال ہے کہ شکار میں سے جو ان پر حرام ہوا وہ خود ان کا اپنے طور پر شکار کرنا ہو۔ کیا تم اللہ تعالیٰ کے اس ارشاد میں نظر نہیں ڈالتے : یٰٓایھا الذین امنوا تقتلوا الصید۔۔۔ اے ایمان والو ! تم احرام کی حالت میں شکا رمت کرو ۔ جو شخص تم میں سے جان بوجھ کر شکار کرے گا تو وہ اس کا بدلہ اسی جیسے جو پائے سے دے “ تو اللہ تعالیٰ نے شار کے قتل سے محرم کو منع فرمایا اور اس کے قتل میں ان پر جزاء کو لازم کیا ۔ اس بات سے یہ دلالت میسر ہوئی کہ محرم پر شکار کا قتل حرام ہے اور نظر کا بھی یہی تقاضا ہے اور اس کی وجہ یہ ہے کہ اس پر سب کا اتفاق ہے کہ احرام کی وجہ سے محرم پر شکار حرام ہوا ہے اور غیر محرم پر شکار کو حرم کی حدود حرام کرنے والی ہیں۔ وہ شخص جس نے حرم سے باہر میں شکار کیا اور پھر اسے حرم کی حدود سے باہر ہی ذبح کیا پھر اس گوشت کو حرم میں داخل کیا تو حرم کے اندر اس گوشت کے کھانے میں کچھ حرج نہیں اور اس کا حرم میں شکار کے گوشت کو لانا حرم کے اندر شکار کو بنفس نفیس لانے کی طرح نہیں ہے جب کہ وہ شکار زندہ ہو اگر شکار زندہ ہو تو اس کا حرم میں داخلہ بھی ممنوع ہے اور حرم میں اس کے گوشت کا کھانا بھی ممنوع ہے اور حرم میں اس کے کھانے سے وہی واجب ہوتا ہے جو شکار کے قتل میں واجب ہوتا ہے۔ پس جب حرم اس شکار کے گوشت سے منع نہیں کرتا جو غیر حرم میں شکار کیا گیا ہو ۔ جیسا کہ زندہ شکار سے روکا جاتا ہے تو اس میں نظر وفکر کا تقاضا بھی یہی ہے کہ احرام کا حکم بھی یہی ہو کہ محرم پر زندہ شکار تو حرام ہو اور شکار کا گوشت حرام نہ ہو بشرطیکہ اس کو غیر محرم نے شکار کر کے ذبح کیا ہو قیاس و نظر یہی چاہتے ہیں۔ اس باب میں نظر یہی ہے اور یہی امام ابوحنیفہ ‘ ابو یوسف ومحمد رحمہم اللہ کا قول ہے۔
جواب : حضرت علی (رض) کی اس اجتہادی تفسیر کے بالمقابل حضرت عمر ‘ طلحہ ‘ عائشہ ‘ ابوہریرہ ] کی تفسیر اس کے خلاف ہے اور جناب رسول اللہ (صلی اللہ علیہ وآلہ وسلم) کی کثیر روایات ان کی موافقت کر رہی ہیں آیت کو روایت سے مقید نہیں کیا بلکہ دوسری آیت سے مقید ہے۔
یا ایھا الذین امنوا لاتقتلوا الصید وانتم حرم ۔۔۔ اس سے معلوم ہوتا ہے کہ شکار کرنے کی ممانعت مراد ہے جس کے ارتکاب پر جزاء لازم کی گئی ہے روایات حدیث نے آیت کے اس مفہوم کو مزید صاف کردیا اب محرم کے لیے قتل صید تو حرام ہی رہا۔
نظر طحاوی (رح) :
جب غور کیا تو اس بات پر اتفاق نظر آیا کہ شکار کو محرم پر حرام کرنے والا احرام ہے اور حلال پر شکار کو حرام کرنے والا حرم ہے۔ جس شخص نے حلال ہونے کی حالت میں حل میں شکار کیا پھر اس کو حرم کی سرزمین میں لے آیا اس کے کھانے میں کوئی حرج نہیں خواہ حل میں کھائے یا حرم میں شکار کے گوشت کو حرم میں داخل کرنے کا وہ حکم نہ ہوا جو شکار کو زندہ حرم میں داخل کرنے کا ہے کیونکہ اس کو زندہ داخل کرنے کی صورت میں اس کا کھانا بھی اسی طرح ممنوع ہوگا جیسا کہ اس کو حرم میں شکار کرنا ممنوع ہے اگر اس نے اس کو حرم میں کھایا تو اس پر وہی ضمان لازم ہوگا جو شکار کرنے پر لازم آتا ہے۔
حاصل کلام : پس نتیجہ یہ نکلا کہ جب حل میں کئے جانے والے شکار کے گوشت کو حرم استعمال سے نہیں روکتا جیسا کہ زندہ شکار سے روکتا ہے تو نظر کا تقاضا یہ ہے کہ احرام کا حکم بھی یہی ہونا چاہیے کہ اسے گوشت کھانا ممنوع نہ ہو مگر زندہ کا شکار کرنا ممنوع رہے بشرطیکہ وہ شکار اس نے خود ذبح نہ کیا ہو بلکہ کسی حلال نے کیا ہو۔ نظر و قیاس کا یہی تقاضا ہے۔
امام ابوحنیفہ ‘ ابو یوسف ‘ و محمد رحمہم اللہ کا یہی قول ہے۔
اس میں طحاوی (رح) نے فریق ثالث کو ترجیح دیتے ہوئے بہت سی روایات مسئلہ کے مختلف پہلوؤں پر روشنی ڈالنے کے لیے پیش کیں آخر میں نظر سے کام لیا اس باب کا اختلاف بھی جواز اور عدم جواز کا ہے۔