٣٧٧٦: اسود بن یزید سے روایت ہے کہ عائشہ صدیقہ (رض) نے فرمایا کہ میں نے جناب رسول اللہ (صلی اللہ علیہ وآلہ وسلم) سے حطیم کے متعلق دریافت کیا کہ کیا وہ بیت اللہ کا حصہ ہے ؟ آپ (صلی اللہ علیہ وآلہ وسلم) نے فرمایا جی ہاں۔ میں نے کہا پھر انھوں نے اسے بیت اللہ کی عمارت میں کیونکر داخل نہ کیا ؟ تو آپ (صلی اللہ علیہ وآلہ وسلم) نے جواب دیا۔ تمہاری قوم کے پاس رقم ختم ہوگئی میں نے پوچھا بیت اللہ کا دروازہ اتنا بلند کیوں ہے آپ (صلی اللہ علیہ وآلہ وسلم) نے فرمایا یہ تمہاری قوم نے اپنی برتری برقرار رکھنے کے لیے کیا تاکہ جس کو وہ چاہیں داخل ہونے دیں جس کو وہ نہ چاہیں داخل نہ ہونے دیں اگر تمہاری قوم نئی نئی مسلمان نہ ہوتی جس سے مجھے خطرہ ہے کہ ان کے دل اسلام سے برگشتہ ہوجائیں گے تو میرا خیال تھا کہ میں حطیم کو بیت اللہ میں داخل کردیتا اور دروازہ کو زمین کے برابر کردیتا۔
تخریج : بخاری فی الحج باب ٤٢‘ والمتنی باب ٩‘ مسلم فی الحج ٤٠٥‘ دارمی فی المناسک باب ٤٤۔