٣٧٨١: عطاء نے ابن عباس (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے فرمایا اے بنی عبد مناف ! اگر تم اس معاملے کے ذمہ دار ہو تو کسی کو اس گھر کا طواف کرنے اور کسی بھی وقت میں نماز پڑھنے سے مت روکو۔ خواہ وہ دن رات کی کوئی سی گھڑی ہو۔ امام طحاوی (رح) فرماتے ہیں کہ علماء کی ایک جماعت نے یہ مؤقف اختیار کیا کہ طواف کی نماز دن اور رات کے کسی وقت میں پڑھی جاسکتی ہے اس کے لیے کوئی ممنوع وقت نہیں خواہ وہ ممنوعہ اوقات سے ہو۔ ان کی دلیل یہ مذکورہ بالا آثار ہیں۔ دیگر علماء نے ان سے اختلاف کرتے ہوئے فرمایا کہ ان آثار میں کوئی اثر بھی آپ کی دلیل نہیں بن سکتا ۔ کیونکہ جناب رسول اللہ (صلی اللہ علیہ وآلہ وسلم) نے بنی عبد المطلب اور بنی عبد مناف کو یہ فرمایا اے بنی عبد المطلب و بنی عبد مناف تم کسی کو طواف اور نماز سے مت منع کرو۔ اس نماز و طواف سے مراد وہ نماز و طواف ہے جو اس طریق پر ہو جو مناسب ہے کہ نماز پڑھی جائے اور جیسا مناسب ہے طواف کیا جائے ۔ باقی جو اس کے علاوہ ہے وہ درست نہیں۔ کیا تم یہ بات نہیں پاتے کہ اگر کوئی شخص بیت اللہ شریف کا ننگا طواف کرلے یا بلاوضو کرلے یا جنابت کے ساتھ طواف کرے تو ان متولیوں کو لازم ہے کہ اسے منع کریں کیونکہ وہ غیر مناسب انداز سے طواف کررہا ہے اور یہ اس ممانعت میں داخل نہیں کہ جس کے متعلق جناب رسول اللہ (صلی اللہ علیہ وآلہ وسلم) نے ترک کا حکم فرمایا۔ پس اسی طرح آپ کا ارشاد (لا تمنعوا احداً یصلی) کی مراد بھی یہی ہے کہ جو اس طریقے سے نماز ادا کررہا ہو جس شرائط و آداب سے ادائیگی کا حکم ہے مثلاً طہارت ‘ ستر عورت اور استقبال قبلہ نماز کے اوقات مباحہ کا لحاظ کر کے نماز پڑھی جائے ۔ باقی جو ان کا لحاظ کیے بغیر ادا کرے وہ مراد نہیں ۔ جناب رسول اللہ (صلی اللہ علیہ وآلہ وسلم) نے طلوع و غروب اور نصف النھار کے اوقات میں نماز کی عمومی نفی فرمائی اسی طرح نماز صبح کے بعد طلوع آفتاب تک اور عصر کے بعد غروب آفتاب تک نماز (نفل) سے روکا گیا اور یہ کثیر و متواتر روایات ہیں جو اسی کتاب میں اپنے موقعہ پر مذکور ہیں اہل مقالہ اول نے اپنے استدلال کے لیے ان روایات کا سہارا لیا ہے۔
تخریج : ابو داؤد فی المناسک باب ٥٢‘ ترمذی فی الحج باب ٤٢‘ نسائی فی المواقیت باب ٤١‘ ابن ماجہ فی الاقامہ باب ١٤٩‘ دارمی فی المناسک باب ٩۔
حاصل روایات : ان دونوں روایات سے ثابت ہوتا ہے کہ بیت اللہ شریف میں جس طرح طواف کی دن رات کی ہر گھڑی میں اجازت ہے اسی طرح نماز کی بھی ہر وقت اجازت ہے نماز فرض و نفل ‘ واجب میں سے کوئی ہو۔ طواف کی دو رکعت کے پڑھنے میں کوئی حرج نہیں خواہ کسی وقت فارغ ہوں۔
فریق ثانی کا مؤقف اور دلیل :
نماز عصر و فجر کے بعد طلوع و غروب تک طواف کی دو رکعات پڑھنا مکروہ تحریمی ہے۔
سابقہ مؤقف کا جواب :
ان دونوں روایات میں تمہارے استدلال کی کوئی بات نہیں بلکہ اس سے مراد طواف کا جو طریق کار مناسب ہے اس کے مطابق اور نماز کا جو طریق کار مقرر ہے اس کے مطابق ادا کرنا مراد ہے جن اوقات میں دوسرے مقامات میں نماز درست ہے ان میں یہاں بھی درست ہے اور جن اوقات میں دوسرے مقام پر نماز ممنوع ہے یہاں بھی ممنوع ہے اور ان اوقات ممنوعہ میں روکنا یہ اس ممانعت میں داخل نہیں۔ ذرا غور کرو کہ بیت اللہ کا بغیر کپڑوں کے ننگے طواف کرنا حرام ہے۔ اسی طرح بلاوضو یا جنابت کی حالت میں ناجائز ہے ان چیزوں کے پیش آنے کی صورت میں وہ طواف کرنے والے کو روک سکتے ہیں یہ ممانعت میں شامل نہیں ہے اسی طرح نماز کے لیے طہارت ‘ ستر عورت ‘ استقبال قبلہ اور اوقات مباحہ کا ہونا جس طرح دوسری جگہ شرط ہے یہاں بھی شرط ہے اگر کوئی بلااستقبال قبلہ نماز پڑھے تو اسے روکا جائے گا یہ اس نہی میں داخل نہ ہوگا۔
جناب رسول اللہ (صلی اللہ علیہ وآلہ وسلم) نے طلوع آفتاب اور غروب آفتاب کے وقت نماز سے اور اسی طرح نصف النہار کے وقت اور صبح کے بعد طلوع تک اور عصر کے بعد غروب تک نماز سے منع فرمایا ہے پس یہ طواف کی رکعات اس ممانعت میں شامل ہوں گی اور ان کی ادائیگی ان اوقات خمسہ میں نہ ہوگی۔
فریق اوّل کی ایک اور مستدل روایت آگے ملاحظہ ہو۔