٣٧٨٢ : ابوالزبیر نے عبداللہ بن باباہ سے روایت کی ہے کہ ابوالدرداء (رض) نے عصر کے بعد طواف کیا اور غروب آفتاب سے پہلے طواف کی دو رکعت ادا کرلیں میں نے کہا تم اصحاب محمد (صلی اللہ علیہ وآلہ وسلم) کہتے ہو کہ عصر کے بعد غروب تک کوئی نماز نہیں ہوتی۔ تو انھوں نے فرمایا۔ اس شہر مکہ کا حکم عام شہروں والا نہیں ہے۔ قول اول کے قائلین کا کہنا یہ ہے کہ حضرت ابو الدرداء (رض) کی روایت اس پر دلالت کر رہی ہے کہ طواف والی نماز اس نہی میں داخل ہی نہیں جس میں اوقات مذکورہ میں نماز ممنوع ہے۔ ان کے جواب میں ہم عرض کریں گے ۔ کہ تم بھی اس حدیث کے مطابق عمل پیرا نہیں ہو کیونکہ ہم یہ بات پاتے ہیں کہ تم از خود مکہ شریف میں ان ممنوعہ اوقات میں دیگر نمازوں کی ادائیگی مکروہ جانتے ہو اس لیے کہ جناب رسالت مآب (صلی اللہ علیہ وآلہ وسلم) نے ان اوقات میں نماز کی ممانعت فرمائی ہے اور اس سلسلہ میں تم مکہ مکرمہ کا حکم دوسرے شہروں سے الگ قرار نہیں دیتے ہو۔ دوسری بات یہ ہے کہ حضرت ابو الدرد اء (رض) نے تو اسی روایت سے تمام نمازوں کے سلسلہ میں مکہ کے حکم کو دوسرے شہروں سے الگ قرار دیا ہے اور یہ صاف بتلایا کہ نہی میں مکہ مکرمہ شامل و داخل نہیں ہے۔ بلکہ ممانعت میں دوسرے شہر مراد ہیں۔ اور ایک بات یہ بھی ہے۔ حضرت ابو الدرد (رض) کے ساتھ اس معاملے میں حضرت عمر (رض) نے اختلاف کیا ہے۔
حاصل کلام ابوالدرداء (رض) کے قول سے معلوم ہوتا ہے کہ طواف کی رکعات ان اوقات کی نہی میں داخل نہیں ہیں۔
اس روایت کا جواب : حضرت ابوالدرداء (رض) کی روایت میں تو رکعات طواف کے علاوہ دیگر تمام نمازوں کے سلسلہ میں کسی بھی وقت طلوع و غروب وزوال میں پڑھنے کا جواز نکل رہا ہے۔ حالانکہ فریق اوّل تو اس کا قائل نہیں۔ صرف طواف کی رکعات کے سلسلہ میں اس بات کا قائل ہوا ہے تو ان نمازوں کے استثنا کی وجہ بتلائیں یا پھر اس روایت سے استدلال چھوڑ دیں اس روایت کے بالمقابل حضرت عمر ‘ معاذ بن عفراء ابن عمر (رض) کا عمل موجود ہے جو عصر و فجر کے بعد طواف کی رکعات کی ممانعت ثابت کررہا ہے پس طواف کی رکعات کے لیے مکہ مکرمہ کا اس حکم سے استثناء روایت ابوالدرداء سے ثابت نہیں ہوسکتا۔