٣٧٩٦: ابن شہاب نے ابو موسیٰ اشعری (رض) سے روایت کی ہے کہ میں جناب رسول اللہ (صلی اللہ علیہ وآلہ وسلم) کی خدمت میں آیا جبکہ آپ (صلی اللہ علیہ وآلہ وسلم) اپنی اونٹنی بطحاء میں بٹھانے والے تھے آپ (صلی اللہ علیہ وآلہ وسلم) نے فرمایا تم نے کیا کیا احرام باندھا ؟ میں نے کہا میں نے وہی احرام باندھا جو اللہ تعالیٰ کے پیغمبر (صلی اللہ علیہ وآلہ وسلم) نے باندھا آپ (صلی اللہ علیہ وآلہ وسلم) نے فرمایا تم نے خوب کیا۔ بیت اللہ کا طواف کرو اور صفا مروہ کی سعی کر کے حلال ہوجاؤ۔ میں نے ایسا ہی کیا پھر میں قیس کی ایک عورت کے پاس آیا اس نے میرے تھوڑے سے بال لیے (کاٹے) میں لوگوں کو یہی فتویٰ دیتا رہا کہ حج کے احرام کو عمرہ میں تبدیل کیا جاسکتا ہے۔ یہاں تک کہ عمر (رض) کا زمانہ آیا تو ایک شخص نے کہا اے عبداللہ بن قیس اپنے فتویٰ کو چھوڑ دو تمہیں معلوم نہیں کہ امیرالمؤمنین نے تیرے بعد کون سی نئی بات پیدا کی چنانچہ میں نے کہا اے لوگو ! میں نے جن کو فتویٰ دیا سو دیا اب امیرالمؤمنین تشریف لا رہے ہیں ان کی اقتداء کرو پس جب عمر (رض) آگئے تو میں ان کی خدمت میں آیا اور اس بات کا ان کے سامنے تذکرہ کیا تو عمر (رض) فرمانے لگے ہمیں اللہ تعالیٰ کی کتاب پر عمل کرنا چاہیے اللہ تعالیٰ نے ہمیں تکمیل کا حکم دیا ہے اور سنت رسول اللہ (صلی اللہ علیہ وآلہ وسلم) کو اپنانا چاہیے جناب رسول اللہ (صلی اللہ علیہ وآلہ وسلم) اس وقت تک حلال نہ ہوئے یہاں تک کہ ہدی اپنے حلال کے مقام تک نہیں پہنچی یعنی نحر کے دن رمی کے بعد۔
تخریج : بخاری فی الحج باب ٣٢‘ مسلم فی الحج ١٥٤۔