٣٨٠٢: عطاء بن ابی رباح نے جابر (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے احرام باندھا اور ہم نے آپ کے ساتھ خالص حج کا احرام باندھا یہاں تک کہ جب ہم مکہ پہنچے تو چار ذی الحجہ تھی ہم نے طواف اور سعی صفاء مروہ کی۔ پھر جناب رسول اللہ (صلی اللہ علیہ وآلہ وسلم) نے حکم فرمایا جس نے ہدی روانہ نہیں کی وہ حلال ہوجائے۔ جابر (رض) کہتے ہیں آپ (صلی اللہ علیہ وآلہ وسلم) نے عورتوں کے متعلق کوئی مستقل بات نہیں فرمائی۔ جابر (رض) کہتے ہیں ہم نے کہا ہم تو چھوڑ دیئے گئے جب ہمارے اور عرفہ کے درمیان پانچ راتیں رہ گئیں تو آپ (صلی اللہ علیہ وآلہ وسلم) نے ہمیں حکم دیا کہ ہم حلال ہوجائیں ہم نے کہا ہم عرفات میں آئیں گے اس حال میں کہ مذی ہمارے مذاکیر سے ٹپک رہی ہوگی آپ (صلی اللہ علیہ وآلہ وسلم) نے احرام نہ کھولا اس لیے کہ آپ ہدی روانہ کرچکے تھے۔
ہماری بات جناب رسول اللہ (صلی اللہ علیہ وآلہ وسلم) کو پہنچ گئی آپ (صلی اللہ علیہ وآلہ وسلم) خطبہ کے لیے کھڑے ہوئے اور اللہ تعالیٰ کی حمدوثناء کی پھر آپ (صلی اللہ علیہ وآلہ وسلم) نے اس بات کا تذکرہ کیا جو ہماری طرف سے پہنچی تھی آپ نے فرمایا تم جانتے ہو کہ میں تم میں سب سے زیادہ سچا اور سب سے زیادہ تقویٰ والا ہوں اور سب سے زیادہ نیکی والا ہوں اگر میں نے ہدی روانہ نہ کی ہوتی تو میں ضرور حلال ہوجاتا۔ اور اگر مجھے اپنے اس معاملے کا پہلے علم ہوتا جو بعد کو علم ہوا تو میں ہدی روانہ ہی نہ کرتا۔ جابر (رض) کہتے ہیں کہ ہم نے آپ (صلی اللہ علیہ وآلہ وسلم) کا یہ حکم سنا اور مان لیا اور احرام کھول دیا۔