٣٨٢٣: ابو نضرہ نے ابو سعید خدری (رض) سے روایت کی ہے کہ ہم جناب رسول اللہ (صلی اللہ علیہ وآلہ وسلم) کے ساتھ حج کا تلبیہ کہتے آئے جب ہم مکہ پہنچے اور بیت اللہ کا طواف اور صفا مروہ سے فارغ ہوئے (تو ہم نے احرام کھول دیئے) پھر جب ترویہ کا دن آیا تو ہم نے حج کا احرام باندھا پھر جب عمر (رض) کا زمانہ آیا تو انھوں نے فرمایا اللہ تعالیٰ نے اپنے پیغمبر کو جو چاہا رخصت دی اور جس موقعہ پر چاہا دی۔ اب تم اپنے حج وعمرہ کی تکمیل کرو یعنی ان کو فسخ کرنے کا تمہیں اختیار نہیں ہے۔ امام طحاوی (رح) فرماتے ہیں اس حکم میں حضرت ابو موسیٰ (رض) والی روایت بھی داخل ہے۔ جس کو اس باب کے شروع میں ہم ذکر کر آئے۔
تخریج : مسلم فی الحج ٢١١؍٢١٢‘ مسند احمد ٣؍٥‘ ٧١‘ ٧٥‘ ١٤٨؍٢٦٦۔
طحاوی (رح) کا قول :
اس رخصت کو خاص کرنے کے لیے بطور ثبوت وہ روایت بھی دلیل ہے جس کو ابو موسیٰ اشعری (رض) نے بیان کیا اور ہم نے اس باب کی فصل اول میں بیان کی ہے۔