٣٨٢٦: کثیر بن عبداللہ نے بکر بن عبدالرحمن سے انھوں نے عبداللہ بن ہلال (رض) سے اسی طرح روایت بیان کی (گزشتہ سند کا اجمال دور کردیا) جناب رسول اللہ (صلی اللہ علیہ وآلہ وسلم) نے ان آثار میں واضح فرما دیا ۔ کہ فسخ جس کا آپ نے اپنے صحابہ کرام کو حکم فرمایا یہ ان کے ساتھ خاص تھا۔ ان کے بعد کسی کے لیے یہ درست نہیں ہم نے جناب رسول اللہ (صلی اللہ علیہ وآلہ وسلم) سے مروی روایات میں صحابہ کرام کے آثار کو بھی ملا دیا ہے کیونکہ یہ بات اپنی رائے سے کہنا ممکن نہیں ۔ وہ روایات اس باب کی ابتداء میں ہم ذکر کر آئے ہیں صحابہ کرام نے یہ باتیں آپ سے اطلاع پانے کے بعد ذکر کی ہیں۔ گویا انھوں نے آپ ہی کی طرف نسبت کر کے یہ بات بیان کی ہے۔ ان آثار کی تصحیح سے یہ بات ثابت ہوگئی کہ حج سے خروج طواف بیت اللہ ہی سے ہوسکتا ہے۔ بعض حضرات نے حج کے فسخ کا انکار کیا اور یہ روایات اپنی دلیل میں ذکرکیں۔
حاصل روایات : ان روایات میں جناب رسول اللہ (صلی اللہ علیہ وآلہ وسلم) نے واضح فرما دیا کہ یہ فسخ کا حکم صحابہ کرام کے ساتھ خاص تھا بعد والے لوگوں کے لیے درست نہیں ہم نے جناب رسول اللہ (صلی اللہ علیہ وآلہ وسلم) کے ارشادات اور صحابہ کرام کے آثار اس سلسلہ میں ملا کر بیان کئے کیونکہ یہ توقیفی چیز ہے جس کو اپنی رائے سے کہنا ممکن نہیں اور اجتہاد کا اس میں کوئی دخل نہیں پس ان کا قول اس سلسلہ میں اسی روایت کی طرح ہے جس کی نسبت جناب رسول اللہ (صلی اللہ علیہ وآلہ وسلم) کی طرف کر کے بیان کی جائے۔
ان آثار سے یہ بات بھی ثابت ہوگئی کہ حج سے خروج طواف بیت اللہ کے بغیر ممکن نہیں۔ بعض نے فسخ حج کا انکار کیا اور انھوں نے اپنے استدلال میں مندرجہ ذیل روایات کو پیش کیا ہے۔
استدلال : فسخ حج کا قول درست نہیں یوم نحر تک سب بدستور سابقہ احرام میں رہے یہ روایات اس کی مؤید ہیں۔