٣٨٢٧: نافع نے ابن عمر (رض) سے روایت کی کہ ہم جناب رسول اللہ (صلی اللہ علیہ وآلہ وسلم) کی معیت میں نکلے ہم حج کا ارادہ رکھتے تھے ہم نے کوئی احرام نہیں کھولا یہاں تک کہ نحر کا دن آیا۔ جن حضرات نے روایت بالا کو اپنے استدلال میں پیش کیا ان کے خلاف دلیل یہ ہے کہ عبداللہ (رض) نے ابن عمر (رض) سے روایت کی ہے جناب رسول اللہ (صلی اللہ علیہ وآلہ وسلم) اور آپ کے اصحاب مکہ میں حج کا تلبیہ کہتے ہوئے داخل ہوئے ۔ تو آپ نے فرمایا جو پسند کرے اس کو عمرہ بنالے البتہ وہ شخص جس کے ساتھ ہدی کا جانور ہو۔ اور یہ روایت اپنی اسناد کے ساتھ اسی باب میں مذکور ہوچکی۔ اس روایت میں یہ بھی ہے کہ جناب رسول اللہ (صلی اللہ علیہ وآلہ وسلم) نے ان کے لیے یہ مقرر فرمایا کہ اگر وہ پسند کریں تو حلال ہوجائیں بلکہ آپ نے ان پر یہ بات مؤکد کردی ۔ پس یہ کہنا بھی درست ہے کہ انھوں نے احرام نہ کھولا اور ان کے لیے احرام کھولنا درست تھا۔ تو یہ بات حج کے فسخ ہی کی طرف لوٹی کہ جو چاہے اسے فسخ کرے اور عمرہ بنالے اور اس سلسلہ میں حضرت عائشہ صدیقہ (رض) سے روایت آئی ہے۔ ذیل میں ملاحظہ ہو۔
اس روایت کو عبداللہ بن رجاء نے انہی عبداللہ بن عمر (رض) سے نقل فرمایا ہے کہ جناب رسول اللہ (صلی اللہ علیہ وآلہ وسلم) اور آپ کے صحابہ کرام حج کا تلبیہ پڑھتے ہوئے مکہ پہنچے تو آپ (صلی اللہ علیہ وآلہ وسلم) نے فرمایا جو چاہے اس کو عمرہ بنا لے البتہ وہ آدمی عمرہ بنا کر احرام نہیں کھول سکتا جس کے پاس ہدی ہو۔ یہ دونوں روایات میں تعارض ہوا تو اب تطبیق کی صرف ایک شکل ہے وہ یہ ہے کہ جناب رسول اللہ (صلی اللہ علیہ وآلہ وسلم) نے حج کو عمرہ بنا کر حلال ہونے کو لازم نہیں فرمایا بلکہ رخصت کے درجہ میں رکھا کہ جو چاہے ایسا کرے اور جو چاہے اپنے احرام پر قائم رہے اور یوم نحر کے دن حلال ہو چنانچہ ابن عمر (رض) ان لوگوں میں سے تھے جنہوں نے رخصت کو استعمال نہیں کیا بلکہ احرام پر قائم رہے تو پہلی روایت میں بیان واقعہ ہے اور اشکال والی روایت میں ابن عمر (رض) کا اپنا عمل مذکور ہے۔ اب تضاد روایات ختم ہوگیا۔