٣٨٣٤: بکر بن عبداللہ نے ابن عمر (رض) سے روایت کی ہے کہ جناب نبی اکرم (صلی اللہ علیہ وآلہ وسلم) اور آپ کے اصحاب مکہ میں حج کا تلبیہ کہتے ہوئے پہنچے اس پر جناب رسول اللہ (صلی اللہ علیہ وآلہ وسلم) نے فرمایا جو چاہے وہ اس کو عمرہ بنا لے البتہ جس کے ساتھ ہدی ہو وہ عمرہ نہیں بنا سکتا۔ حضرت ابن عمر (رض) نے بکر بن عبداللہ کی روایت میں خبر دی ہے کہ آپ (صلی اللہ علیہ وآلہ وسلم) مکہ تشریف لائے تو آپ حج کا تلبیہ کہنے والے تھے اور سالم (رح) والی روایت میں انھوں نے خبر دی ہے کہ جناب رسول اللہ (صلی اللہ علیہ وآلہ وسلم) نے ابتداء عمرہ کے احرام سے فرمائی۔ ہمارے ہاں اس روایت کا معنیٰ (واللہ اعلم) یہ ہے کہ پہلے آپ حج کا احرام باندھنے والے تھے کہ وہ مطلق حج ہے پھر اس کو فسخ کردیا اسے عمرہ بنا لیا اور عمرے کا تلبیہ کہا ۔ پھر آپ نے اس کے ساتھ حج کا فائدہ حاصل کیا تاکہ سالم و بکر کی دونوں روایات درست ہوجائیں اور ان میں باہمی تضاد نہ رہے ۔ جناب رسول اللہ (صلی اللہ علیہ وآلہ وسلم) نے جس حج کا ارادہ کیا تھا اس کو فسخ کردیا اور اپنے صحابہ کرام کو بھی اسی کا حکم فرمایا اور یہ ان کے طواف بیت اللہ کے بعد کی بات ہے۔ ہم نے فسخ حج میں اس کی تفصیل کر کے دوبارہ تذکرہ سے بےنیاز کردیا ہے۔ یہ بات تو ناممکن ہے کہ آپ کا وہ طواف جسے آپ نے عمرہ کے لیے کیا جس کو آپ نے حج میں تبدیل کرلیا وہ اس کیلئے بھی کافی ہو اور اس حج کے لیے بھی مکتفی بنے جس کا احرام آپ نے بعد کو باندھا لیکن ہمارے ہاں اس کی وجہ (واللہ اعلم) یہ ہے کہ آپ نے یوم نحر سے قبل اپنے حج کا طواف نہیں کیا کیونکہ وہ طواف جو یوم نحر سے پہلے حج میں کیا جاتا ہے وہ تو طواف قدوم ہے اور اسی لیے کیا جاتا ہے۔ وہ حج کا رکن نہیں ہے۔ پس ابن عمر (رض) نے اس طواف پر اکتفاء کیا جو آپ نے قدوم کے بعد اس عمرہ کے لیے کیا جس کو آپ نے حج سے بدل لیا اور یہ اسی طرح ہے جیسا ابن عمر (رض) کا اپنا فعل مروی ہے۔ ذیل میں ملاحظہ ہو۔
تخریج : مسند احمد ٢؍٢٨۔
حاصل روایت : اب اس روایت سے معلوم ہو رہا ہے کہ جناب رسول اللہ (صلی اللہ علیہ وآلہ وسلم) مکہ میں تلبیہ حج کے ساتھ داخل ہوئے جبکہ روایت سالم میں یہ آیا ہے کہ جناب رسول اللہ (صلی اللہ علیہ وآلہ وسلم) نے احرام کی ابتداء عمرہ سے فرمائی۔
طریق تطبیق : ہمارے ہاں ان کا مفہوم یہ ہے کہ ابتداء میں آپ (صلی اللہ علیہ وآلہ وسلم) نے حج کا احرام باندھا اس طور پر کہ وہ فقط حج ہے پھر اس کو فسخ کیا اور اس کو عمرہ بنا لیا اور عمرہ کا تلبیہ کہا پھر اس کو حج کے ساتھ ملا کر تمتع بنایا اب اس طرح دونوں روایات کا تضاد ختم ہوگیا۔ مندرجہ بالا صورت سے یہ بات ناممکن ہوجاتی ہے کہ جناب رسول اللہ (صلی اللہ علیہ وآلہ وسلم) نے مکہ مکرمہ پہنچ کر جو طواف و سعی فرمائی وہ اس حج کے لیے کافی تھی جس کا احرام ہی بعد میں باندھا اور یہ اسی وقت درست ہوسکتا ہے جب اس بات کو مان لیا جائے کہ آپ (صلی اللہ علیہ وآلہ وسلم) نے حج کا طواف و سعی یوم نحر کو ادا فرمایا رہا وہ طواف و سعی جو یوم نحر سے پہلے کی وہ طواف قدوم سے تھی حج کے لیے نہ تھی اور یہاں انھوں نے صرف طواف قدوم پر اکتفا فرمایا اور حج میں طواف کا اعادہ نہیں کیا۔ اس سے ثابت ہوا کہ اشکال میں پیش کردہ روایت میں صرف ابن عمر (رض) کا عمل ثابت ہو رہا ہے اور انھوں نے اپنے عمل کو جناب رسول اللہ (صلی اللہ علیہ وآلہ وسلم) کے عمل سے تشبیہہ دی تو وہ صرف عمرے کو حج کے ساتھ ملانے والے عمل میں موافقت کا بیان ہے۔ اور اس کی مثال ابن عمر (رض) کے عمل میں ایوب بن موسیٰ کی روایت میں موجود ہے۔