٣٨٣٩: عبدالملک نے عطاء سے ‘ انھوں نے عائشہ (رض) روایت کی ہے کہ میں نے جناب رسول اللہ (صلی اللہ علیہ وآلہ وسلم) کی خدمت میں گزارش کی کہ یارسول اللہ (صلی اللہ علیہ وآلہ وسلم) آپ کی تمام ازواج حج وعمرہ دونوں کی سعادت سے بہرہ ور ہو کر لوٹیں گی مگر میں اس سے محروم رہوں گی تو اس کے جواب میں آپ (صلی اللہ علیہ وآلہ وسلم) نے فرمایا تم کوچ کرو تمہارے لیے حج ہی دونوں کی جگہ کافی ہے اس پر عائشہ (رض) نے اصرار کیا جیسا کہ حجاج راوی نے عطاء سے اپنی روایت میں الحت علی رسول اللہ ﷺ کے الفاظ ہیں تو آپ (صلی اللہ علیہ وآلہ وسلم) نے ان کو مقام تنعیم سے احرام عمرہ باندھنے کا حکم فرمایا اور ان کے بھائی عبدالرحمن بن ابی بکر (رض) کو ان کے ساتھ بھیجا وہاں سے انھوں نے عمرہ کا احرام باندھا پھر انھوں نے آ کر طواف و سعی کی اور قصر کی۔ ان کی طرف سے جناب رسول اللہ (صلی اللہ علیہ وآلہ وسلم) نے دم شکر دیا۔ عبدالملک کی روایت میں گائے ذبح کرنے کا ذکر ہے۔ پس عبد الملک نے اپنی روایت میں حضرت عائشہ صدیقہ (رض) سے ان کا واقعہ تفصیل سے لکھا ہے۔ انھوں نے عمرہ کا احرام اس وقت باندھا جب کہ وہ حج وعمرہ سے فارغ ہو کر کوچ کرنے والی تھیں اور یہ بھی ذکر کیا گیا کہ ان کو یہی کافی ہے تو مطلب حج ہے جو حج وعمرہ کی طرف سے کافی تھا نہ کہ طواف ۔ پس روایت عطاء میں طواف قارن کے حکم سے متعلق اس سے استدلال باطل ہوگیا کہ اس کی کیفیت کیا تھی اور وہ لوگ جو حج وعمرہ کا ایک طواف مانتے ہیں انھوں نے اس روایت سے بھی استدلال کیا ہے۔
تخریج : بخاری فی الحج باب ٣٤‘ مسلم فی الحج ١٢٨‘ مسند احمد ٦؍١٢٢۔
حاصل روایات : اس روایت سے ثابت ہوا کہ حج سے فراغت کے بعد یہ بات آپ نے فرمائی کہ تمہارا یہ حج تمہارے حج وعمرہ کی طرف سے کافی ہے اس سے طواف ہرگز مراد نہیں۔ پس قارن کے طواف کے سلسلہ میں اس کو دلیل بنانا باطل ہے۔
فریق اوّل کی دلیل رابع :
قارن کے لیے ایک طواف اور ایک سعی پر اس روایت سے بھی استدلال کیا جاتا ہے۔