٣٨٤٤: ابن ابی ملیکہ نے عائشہ (رض) سے روایت کی ہے۔ اس روایت میں یہ ہے کہ جناب رسول اللہ (صلی اللہ علیہ وآلہ وسلم) نے حیض آنے پر اسے حکم دیا کہ وہ اپنا عمرہ چھوڑ دے اور یہ اس کے طواف سے پہلے کی بات ہے کس طرح ممکن ہے کہ وہ اس حج کا طواف پہلے کرلیں جس کا احرام بعد میں باندھا اور وہ طواف اس کے حج وعمرہ کی طرف سے کافی ہوجائے جس عمرہ کو اس نے مجبوراً چھوڑ دیا۔ یہ ناممکن بات ہے۔ اس روایت میں یہ ہے کہ جناب رسول اللہ (صلی اللہ علیہ وآلہ وسلم) نے حضرت عائشہ صدیقہ (رض) کو حکم فرمایا جب کہ ان کو ایام حیض پیش آگئے کہ وہ عمرہ کو ترک کردے اور یہ حضرت عائشہ صدیقہ (رض) کے طواف سے پہلے کی بات ہے۔ پس کس طرح ان کا وہ طواف جو انھوں نے حج کے لیے کرنا تھا اور اس کا احرام بعد میں باندھا وہ اس حج کے طواف اور اس عمرہ کے طواف کی جگہ کام دے گا جس عمرہ کو انھوں نے فسخ کردیا۔ یہ بات ناممکن ہے اور اسود (رح) نے بھی ان سے اس سلسلہ میں روایت نقل کی ہے۔ روایت اسود (رح) ذیل میں ہے۔