٣٨٤٥: اسود نے عائشہ (رض) سے روایت کی ہے کہ ہم مدینہ منورہ سے نکلے اور ہمارا خیال فقط حج ہی کا تھا جب آپ (صلی اللہ علیہ وآلہ وسلم) مکہ تشریف لائے اور طواف کر کے حلال نہ ہوئے آپ کے پاس ہدی تھی پس آپ کے ساتھ ازواج اور اصحاب نے طواف کیا۔ وہ حلال ہوگئے جن کے پاس ہدی نہیں تھی اور حضرت عائشہ (رض) کو حیض کے ایام شروع ہوئے پس ہم نے اپنے حج کے احکام ادا کئے جب ایام تشریق کے بعد والی رات آئی (لیلۃ الحصبہ اس رات کو منیٰ سے واپسی پر محصب میں اترتے ہیں) تو میں نے کہا یارسول اللہ (صلی اللہ علیہ وآلہ وسلم) کیا آپ کے اصحاب تو حج وعمرہ کے ساتھ واپس جائیں اور میں فقط حج کے ساتھ لوٹ جاؤں ؟ آپ (صلی اللہ علیہ وآلہ وسلم) نے فرمایا۔ کیا تم نے ان راتوں میں طواف نہیں کیا جب ہم مکہ آئے۔ عائشہ (رض) نے کہا نہیں۔ آپ (صلی اللہ علیہ وآلہ وسلم) نے فرمایا اپنے بھائی کے ساتھ تنعیم جاؤ اور عمرہ کا احرام باندھو پھر تم فلاں فلاں جگہ پہنچ جاؤ۔ یہ روایت اس بات پر دلالت کر رہی ہے۔ کہ حضرت صدیقہ (رض) اپنے عمرہ سے نکل گئیں جو فسخ حج کے سبب ان کے حج کی جگہ حیض کے پیش آنے کی بناء پر آیا تھا اس لیے کہ وہ اس عمرے کا طواف کیے بغیر عرفات کی طرف گئیں ۔ کیونکہ جناب رسول اللہ (صلی اللہ علیہ وآلہ وسلم) نے اسے فرمایا کہ تو اس عمرے سے فارغ ہوگئی ہے جب کہ اس نے اطلاع دی کہ میں نے مکہ پہنچنے کی راتوں میں طواف نہیں کیا تھا آپ نے ان کے ان افعال کو جو حضرت صدیقہ (رض) نے اپنے حج کے لیے کیے مثلاً وقوف عرفات یا اس کی طرف روانہ ہونا وغیرہ ان کو عمرہ سے نکالنے والا قرار دیا ۔ اسی وجہ سے آپ نے ان کو حکم دیا کہ وہ اس کی جگہ مقام تنعیم سے احرام عمرہ باندھے۔ اب اس قائل کو کس طرح یہ حق پہنچتا ہے کہ وہ یہ کہے کہ ان کا طواف حج کے لیے تھا۔ اور وہ اس بعد والے حج اور دوسرے عمرے کے لیے کافی ہوجائے گا حالانکہ وہ اس عمرے سے تو وہ پہلے نکل چکیں ۔ ہمارے ہاں یہ بات ناممکن ہے اور قاسم بن محمد نے بھی اس سلسلہ میں حضرت عائشہ صدیقہ (رض) سے روایت کی ہے۔ ذیل میں ملاحظہ ہو۔
تخریج : بخاری فی الحج باب ٣٤‘ مسلم فی الحج ١٢٨‘ ابو داؤد فی المناسک باب ٢٣۔
حاصل روایت : یہ روایت دلالت کر رہی ہے کہ وہ اپنے اس عمرہ سے نکل گئی تھیں جو حج کے فسخ کے بعد انھوں نے باندھا تھا اور نکلنے کا سبب حیض تھا۔ حیض عرفات سے پہلے پیش آیا اور عمرہ کا طواف بھی ابھی نہ کیا تھا کیونکہ جناب رسول اللہ (صلی اللہ علیہ وآلہ وسلم) نے عائشہ (رض) کو فرمایا : اما کنت طفت بالبینتِ لیالی قدمنا ؟ یعنی اگر تو نے حیض سے قبل طواف کرلیا ہوتا تو تیرا عمرہ تیرے حج کے ساتھ پورا ہوجاتا جس سے تو فارغ ہوچکی۔
جب عائشہ (رض) نے آپ کو اطلاع دی کہ ان راتوں میں ‘ میں نے طواف نہیں کیا تو حج کے لیے کئے جانے والے افعال وقوف عرفات وغیرہ کو عمرہ سے خارج قرار دیا اور تنعیم سے الگ عمرہ کرنے کا حکم دیا۔
اب اس کے باوجود پھر کسی کو کیا حق ہے کہ وہ یہ کہے کہ ان کا حج والا طواف حج کا بھی تھا اور اس عمرے کا بھی تھا جس کو حیض کی وجہ سے وہ فسخ کرچکی تھیں اور نکل چکی تھیں ہمارے ہاں تو یہ ناممکن بات ہے۔ عبدالرحمن بن قاسم عن ابیہ عن عائشہ (رض) کی روایت ملاحظہ ہو۔