٣٨٨٨: عطاء نے ابن عباس (رض) سے روایت کی کہ جناب رسول اللہ (صلی اللہ علیہ وآلہ وسلم) نے عباس (رض) کو مزدلفہ کی رات فرمایا تم ہمارے کمزوروں اور عورتوں کو لے جاؤ تاکہ وہ صبح کی نماز منیٰ میں ادا کریں اور جمرہ عقبہ کی رمی اس سے پہلے پہلے ادا کرلیں کہ لوگوں کی بھیڑ ان کو پہنچے۔ امام طحاوی (رح) فرماتے ہیں علماء کی ایک جماعت کہتی ہے کہ کمزور لوگ طلوع صبح صادق کے بعد جمرہ عقبہ کو کنکریاں مار سکتے ہیں اور انھوں نے مذکورۃ الصدر روایت کو اپنا مستدل بنایا ہے۔ مگر دیگر علماء نے ان سے اختلاف کرتے ہوئے فرمایا کہ طلوع آفتاب تک کنکریاں مارنا مناسب نہیں ہے اگر انھوں نے اس سے پہلے کنکریاں ماردیں تو وہ کافی ہوجائیں گی مگر وہ غلطی کرنے والے ہیں۔ ان کا کہنا یہ ہے کہ روایت شعبہ میں حضرت ابن عباس (رض) نے اس بات کا ذکر نہیں کیا کہ انھوں نے طلوع صبح صادق کے وقت جناب رسول اللہ (صلی اللہ علیہ وآلہ وسلم) کے حکم سے کنکریاں ماری تھیں۔ عین ممکن ہے کہ انھوں نے یہ خیال کر کے کنکریاں ماریں کہ یہ مارنے کا وقت ہے۔ جب کہ حقیقت میں اس کا وقت اس کے علاوہ ہو اور عطاء (رح) نے ابن عباس (رض) سے جو روایت کیا ہے اس میں بھی جمرہ عقبہ کی کنکریوں کا وقت مذکور نہیں کہ آیا وہ طلوع آفتاب سے پہلے تھا یا بعد اول قول کے قائلین نے اپنے مؤقف کے لیے اس روایت کو بھی اپنا مستدل بنایا ہے۔ روایت ذیل میں ہے۔
راوی کہتے ہیں کہ عطاءؒ کبروضعف کی عمر میں اسی طرح کرتے تھے۔
فریق ثانی کا مؤقف اور جوابات و دلائل :
طلوعِ آفتاب سے پہلے رمی درست نہیں اگر رمی کرلی تو کفایت کر جائے گی مگر مکروہ ہے طلوع فجر سے قبل تو جائز ہی نہیں۔
سابقہ مؤقف کا جواب : ابن عباس (رض) کی روایت میں اس کا تذکرہ نہیں کہ انھوں نے جناب رسول اللہ (صلی اللہ علیہ وآلہ وسلم) کے حکم سے جمرہ عقبہ کی رمی کی اور یہ بھی کہہ سکتے ہیں کہ انھوں نے طلوع فجر سمجھ کر رمی کی ہو اور فجر اس وقت تک طلوع نہ ہوئی ہو احتمال کی وجہ سے حجت نہ بنی۔
روایت عطاء میں سرے سے رمی جمرہ عقبہ کا وقت مذکور ہی نہیں کہ آیا وہ طلوع آفتاب کے بعد تھی یا پہلے۔ پس یہ روایت مستدل ہی نہیں۔