٤٠٣٢: ابن ازہر کے مولیٰ ابو عبید کہتے ہیں کہ میں علی و عثمان ] کے ساتھ عید میں موجود تھا وہ نماز پڑھ کر لوٹتے پھر لوگوں کو وعظ و نصیحت کرتے میں نے ان کو یہ تقریر کرتے سنا کہ جناب رسول اللہ (صلی اللہ علیہ وآلہ وسلم) نے ان دو دنوں کے روزے سے منع فرمایا ہے۔ یوم نحر اور یوم فطر۔ ان کا کہنا یہ ہے کہ جب ان روایات سے ایام تشریق میں روزے کی مخالت جناب نبی اکرم (صلی اللہ علیہ وآلہ وسلم) سے ثابت ہوگئی۔ اور آپ نے لوگوں کو منیٰ میں منع فرمایا جب کہ حجاج وہاں قیام پذیر تھے ‘ ان میں متمتع ‘ قارن سبھی لوگ تھے ۔ آپ نے کسی متمتع اور قارن کا استثناء بھی نہیں فرمایا ۔ معلوم ہوا کہ اس ممانعت میں تمتع اور قارن سب شامل ہیں۔ اگر کوئی معترض کہے کہ ان روایات کی دوسری روایات سے اور اولولیت کی کیا وجہ ہے۔ تو اس کے جواب میں کہا جائے گا کہ ان روایات کا تواتر اور صحت وجہ ترجیح ہے اور اسی طرح پہلی روایات میں وارد کمزوریاں ہیں۔ ان کمزور روایات میں یحییٰ بن سلام کی روایت ہے ‘ حالانکہ وہ حدیث منکر ہے۔ محدثین یحییٰ بن سلام اور ابن ابی لیلیٰ کے ضعف کی وجہ سے اس روایت کو درست قرار نہیں دیتے ۔ مجھے کسی اہل علم پر طعن پسند نہیں مگر اہل روایت نے جو کہا ہے اس کو بیان کرنا میرا فرض ہے۔ انھیں میں یزید بن سنان کی روایت ہے۔ جس کو ہم نے اس کے حضرت ابن عمر اور حضرت عائشہ صدیقہ (رض) سے روایت کیا ہے۔ وہ فرماتے ہیں کہ محصر و متمتع کے علاوہ کسی کے لیے بھی ایام تشریق میں روزے کی اجازت نہیں۔ عین ممکن ہے کہ انھوں نے اپنے اس قول سے وہ بات مراد لی ہو جس کو اللہ تعالیٰ نے قرآن میں ذکر فرمایا (فصیام ثلاثۃ ایام فی الحج) پس حج کے دنوں میں تین دن کے تو وزے ہیں۔ انھوں نے ایاں تشریق کو ایام حج سے قرار دیا اور فرمایا کہ متمتع و محصر کو اس آیت میں ایام تشریق میں روزے کی اجازت دی گئی کیونکہ ان کے ہاں یہ دن ایام حج میں سے ہیں۔ ان کو جناب رسول اللہ (صلی اللہ علیہ وآلہ وسلم) کا یہ ارشاد جو آپ نے منیٰ میں لوگوں کو فرمایا کہ یہ ان ایام میں سے نہیں جن میں روزہ رکھنا درست ہے۔ روایات کی تصحیح کے لحاظ سے اس باب کا یہ حکم ہے۔ نظر وفکر کے لحاظ سے اس باب کی وضاحت اس طرح ہے کہ ہم جانتے ہیں کہ اس بات پر سب کا اتفاق ہے کہ ایام قربانی میں کسی قسم کا روزہ درست نہیں اور وہ ایام تشریق کی نسبت ایام حج کے قریب تر ہے۔ اس لیے کہ جناب رسول اللہ (صلی اللہ علیہ وآلہ وسلم) نے اس دن میں روزہ کو منع فرمایا ہے۔ جیسا کہ ان شاء اللہ آئندہ مذکور ہوگا۔ جس طرح اسی نہی میں متمتع اور قارن اور محصر تمام داخل ہیں ایام تشریق میں روزہ رکھنے کی ممانعت بھی ان تمام کو شامل ہے۔ جناب رسول اللہ (صلی اللہ علیہ وآلہ وسلم) سے یوم نحر کے روزہ کی ممانعت والی روایات ذیل میں ہیں۔