٤٠٥٣: سالم نے ابن عمر (رض) سے روایت کی ہے کہ وہ فرمانے لگے محصر اس وقت حلال ہوگا جب بیت اللہ کا طواف کرے گا اور صفا ومروہ کی سعی کرے گا اور اگر وہ مرض کی وجہ سے کسی کپڑے اور دوا کے استعمال پر مجبور ہوگا تو جتنا مجبور ہے اتنا کرے اور اس کا فدیہ دے گا۔ ان روایات سے بھی ہماری تاویل کے موافق بات اصحاب رسول اللہ (صلی اللہ علیہ وآلہ وسلم) سے ثابت ہوئی اور حدیث حجاج بن عمرو میں بھی یہ بات مذکور ہوئی ہے۔ اس کے بعد اس بارے میں اختلاف ہے کہ یہ کس احصار کا حکم ہے اور وہ احصار کس چیز سے ہو اور کس مفہوم میں ہو ۔ تو ایک گروہ علماء کا قول یہ ہے کہ ہر رکاوٹ مرض وغیرہ اس کا سبب ہوسکتا ہے۔ امام ابوحنیفہ ابو یوسف ‘ محمد رحمہم اللہ کا یہ قول ہے اور ہم نے اسی باب میں حضرت ابن مسعود ابن عباس (رض) سے روایت کی ہے۔ مگر دیگر علماء کہتے ہیں کہ احصار جو ہم نے بیان کیا وہ دشمن والا احصار ہے مرض والا احصار نہیں ہے۔ حضرت ابن عمر (رض) کا یہی قول ہے۔
حاصل روایت : حجاج (رض) کی روایت کی جو تاویل ہم نے پیش کی ہے اس کے مطابق اصحاب رسول اللہ (صلی اللہ علیہ وآلہ وسلم) کی کئی روایات ہم نے نقل کردیں۔
عنوان ثالث۔ احصار کن چیزوں سے ثابت ہوگا :
فریق اوّل کا مؤقف : احصار صرف دشمن سے ہوتا ہے اور کوئی چیز مثلاً مرض وغیرہ اسباب احصار سے نہیں ہے دلیل یہ روایات ہیں۔