٤٠٧٨: حرب بن شداد نے یحییٰ بن ابی کثیر سے نقل کیا پھر انھوں نے اپنی اسناد سے روایت نقل کی ہے۔ البتہ اس میں ان الفاظ کا فرق ہے۔ ” ان اللہ عزوجل حبس عن اہل مکۃ الفیل “ اور یہ بھی فرق ہے۔ ” ولا یلتقط ضال تھا الا لمنشد “ ان روایات میں جناب رسول اللہ (صلی اللہ علیہ وآلہ وسلم) نے یہ اطلاع دی ہے کہ آپ سے پہلے اور بعد کسی کے لیے بھی مکہ حلال نہیں ہوا ۔ آپ کے لیے بھی دن کی ایک گھڑی حلال ہواپھر قیامت تک اس کی حرمت واپس لوٹ آئی۔ تو یہ اس بات پر دلالت ہے کہ جب آپ اس میں داخل ہوئے تو وہ آپ کے لیے حلال تھا اس وجہ سے آپ بلا احرام داخل ہوئے ۔ لیکن اس کے بعد وہ حرم ہے کسی کو بلا احرام داخلے کی اجازت نہیں ہے۔ اگر کوئی معترض یہ کہے کہ آپ کے لیے حلال ہونے کا تو مطلب یہ ہے کہ اس میں خون ریزی اور ہتھیار نکالا ہے اور کوئی مطلب نہیں۔ اس کے جواب میں کہیں گے ۔ کہ یہ بات ناممکن ہے کیونکہ اگر صرف اسی مقصد کے لیے حلال ہوا ہوتا تو آپ یہ نہ فرماتے کہ میرے بعد کسی کے لیے حلال نہیں اور ہم اس بات کو پاتے ہیں کہ تمام علماء کا اس پر اتفاق ہے کہ اگر مشرکین کا مکہ پر غلبہ ہوجائے اور وہ مسلمانوں و وہاں سے روک دیں تو مسلمانوں سے لڑنا اور ہتھیار نکالنا اور ان کا خون بہانا جائز ہے ‘ اس سلسلہ میں تو اس کے جواز کا حکم وہی ہے جو آپ کے لیے تھا۔ پس اس سے یہ دلالت مل گئی کہ آپ (صلی اللہ علیہ وآلہ وسلم) کے لیے جو بات خاص تھی اور جب لڑائی کی نفی ہوگئی تو اس کا احرام ہونا خود ثابت ہوگیا ۔ کیا یہ بات تمہارے سامنے نہیں کہ حضرت عمر وبن سعید نے حضرت ابو شریح (رض) کو کہا کہ حرم کسی خون ریز تخریب کار کو پناہ نہیں دیتا اور نہ اطاعت سے نکلنے والے کو پناہ دیتا ہے تو حضرت ابو شریح (رض) نے ان کی بات سے انکار نہیں کیا اور یہ نہیں کہا کہ جناب رسول اللہ (صلی اللہ علیہ وآلہ وسلم) کی مرادوہی ہے جو میں نے بیان کی “ کہ مکہ ہر قسم کے لوگوں کو پناہ دیتا ہے۔ بلکہ انھوں نے اس کو پہچانا اور اس کا انکار نہ کیا۔ یہ ابن عباس (رض) ہیں جنہوں نے جناب رسول اللہ (صلی اللہ علیہ وآلہ وسلم) سے یہ بات روایت کی ہے پھر اپنی رائے و اجتہاد سے فرمایا کہ کوئی حرم میں بلا احرام نہ داخل ہو ‘ ہم اس بات کو اس کے موقعہ پر لائیں گے ان شاء اللہ تعالیٰ ۔ ان کا یہ قول اس بات پر دال ہے کہ جناب رسول اللہ (صلی اللہ علیہ وآلہ وسلم) کے لیے اس کے حلال ہونے کا مطلب ہتھیاروں کے ظاہر کرنے پر محمول نہیں بلکہ اس سے دوسرا معنیٰ مراد ہے۔ جب اس قول کی نفی ہوگئی اور دوسرا سبب پایا نہیں جاسکتا تو احرام کا ہونا خود ثابت ہوگیا۔ اب ہمارے لیے یہ لازم ہے کہ میقات کے اندر کا علاقہ مکہ تک کیا حکم رکھتا ہے۔ کیا ان کے احرام کے بغیر حرم میں داخلہ درست ہے یا نہیں ہم نے یہ بات پائی کہ جب کوئی حرم میں داخلے کا ارادہ کرتا ہے تو وہ بلا احرام داخل نہیں ہوتا خواہ وہ حرم میں احرام کا ارادہ رکھتا ہو یا دیگر کوئی عمل کرنا چاہتا ہو اور یہ بھی ہمارے سامنے ہے کہ جو شخص مواقیت اور حرم کے درمیان والے مقامات میں جانا چاہے۔ وہ بلا احرام جاسکتا ہے۔ اس سے ثابت ہو کہ جب ان مقامات میں ضرورت کے لیے جائے تو بلا احرام جائے گا ۔ جیسا کہ مواقیت سے پہلے کا حکم ہے اور وہاں کے رہنے والے حرم میں اسی طرح داخل ہوں جس طرح میقات سے باہر کے آفاقی لوگ داخل ہوتے ہیں۔ اس باب میں امام طحاوی کے نزدیک قیاس یہی ہے اور حضرت امام ابوحنیفہ ‘ ابو یوسف ‘ محمد (رح) کے قول کے خلاف ہے۔ روایات ذیل میں ہیں۔
تخریج : ٤٠٧٨ روایت کی تخریج ملاحظہ ہو۔
حاصل روایات : ان آثار میں جناب رسول اللہ (صلی اللہ علیہ وآلہ وسلم) نے بتلایا کہ مکہ مجھ سے پہلے کسی کے لیے حلال نہیں ہوا اور نہ بعد میں کسی کے لیے حلال ہے آپ کے لیے دن کے ایک حصہ میں حلال کیا گیا۔ پھر اس کی حرمت واپس لوٹ آئی جیسا کہ پہلے تھی اور وہ قیامت تک باقی رہے گی۔
اس سے یہ ثابت ہوا کہ آپ جب اس میں داخل ہوئے تو وہ آپ کے لیے حلال تھا اور اس لیے اس میں اس طرح داخل ہوئے۔ اس کے بعد پہلے کی طرح حرام ہوگیا پس اس میں کسی کو بلا احرام داخلہ جائز نہ ہوگا اگر داخل ہوگا تو دم حرمت کو توڑنے کی وجہ سے بطور تاوان دینا پڑے گا۔
اشکال :
تم نے حلت مکہ کو عموم پر محمول کیا یہ درست نہیں بلکہ حلت مکہ سے مراد اس میں قتال کی حلت ‘ ہتھیار اٹھانے کا جواز ‘ خون کے بہانے کا جواز مراد ہے ہر طرح کی حلت مراد نہیں کہ اس سے تم بلا احرام داخلہ کی حلت ثابت کر کے پھر حرمت دخول بلا احرام کو ثابت کرسکو۔
نوٹ : آپ کا یہ اشکال درست نہیں اگر صرف قتال وغیرہ کی حلت مراد ہو تو اس میں آپ کی خصوصیت نہیں رہتی کیونکہ اس بات پر سب کا اتفاق ہے اگر بالفرض مشرکین کا مکہ پر غلبہ ہوجائے۔ (خدانخواستہ) اور وہ مسلمانوں کو وہاں سے نکال باہر کریں تو حصول غلبہ کے لیے ان سے قتال اور ان کا قتل اور ہتھیار اٹھانے جائز ہی نہیں بلکہ ضروری ہوگا اور قتال کی اباحیت تو اس سلسلہ میں آپ کے بعد بھی اسی طرح ہوگی جیسے آپ (صلی اللہ علیہ وآلہ وسلم) کے لیے تھی۔
اس سے یہ بات ثابت ہوئی کہ جناب نبی اکرم (صلی اللہ علیہ وآلہ وسلم) نے ” لایحل لاحد بعدی “ کا کلمہ فرمایا۔ تو وہ آپ کی خصوصیت ہے اور وہ حلت عامہ ہے جس میں بلا احرام داخلہ بھی شامل ہے صرف قتال نہیں۔ ورنہ یہ جملہ بلافائدہ ہوگا۔
ذرا غور کرو۔ عمرو بن سعید نے ابو شریح (رض) کو یہ کہا کہ حرم خون بہانے والے۔ خرابی مچانے والے اور امیر کی اطاعت سے علیحدگی والے کو نہیں روکتا۔ تمہاری اس روایت کی وجہ سے جو تم نے بیان کی تو ابو شریح نے اس کی بات پر نکیر نہیں کی اور نہ یہ کہا کہ جناب نبی اکرم (صلی اللہ علیہ وآلہ وسلم) نے اس روایت سے یہ مراد لی ہے کہ حرم کبھی تمام قسم کے لوگوں کو پناہ دیتا ہے لیکن اس کو جانا اور اس کی بات پر نکیر نہیں فرمائی۔
اور عبداللہ بن عباس (رض) کی روایت کو ملاحظہ کرو کہ وہ فرماتے ہیں کوئی شخص حرم میں بلا احرام داخل نہ ہو اس سے یہ ثابت ہوتا ہے کہ آپ (صلی اللہ علیہ وآلہ وسلم) سے جو روایت انھوں نے نقل کی ہے اس سے مراد اظہار اسلحہ اور قتال نہیں بلکہ دوسرا معنی مراد ہے۔ جب اس معنی کی نفی ہوگئی تو دوسرا معنی جو ان کے فتویٰ میں مذکور ہے خود ثابت ہوگیا۔
عنوان خامس : اہل مواقیت کو حل والوں کی طرح مکہ میں بلا احرام داخلہ کی اجازت کے قول پر تنقید۔
نظر طحاوی (رض) :
جب کوئی آدمی حرم میں داخل ہونا چاہتا ہو تو اسے احرام سے داخل ہونا ہوگا۔ خواہ احرام کے لیے حرم میں داخل ہونا چاہتا ہو یا احرام کے علاوہ تجارت وغیرہ کی غرض ہو۔
اسی طرح جو آدمی ان مقامات میں داخل ہونا چاہے جو حل میں واقع ہیں اور وہ کسی ضرورت ذاتی سے حل میں داخلہ چاہتا ہو تو بلا احرام اس کا داخلہ درست ہے۔ اس سے یہ بات ثابت ہوگئی کہ ان مقامات کا حکم جبکہ ذاتی ضرورت سے داخل ہو تو بلا احرام کا ہے اور یہی حکم میقات سے باہر کا ہے ان مقامات کے رہنے والے حرم میں اسی طرح داخل ہوں گے جس طرح میقات سے باہر رہنے والے۔ اس سے ثابت ہوا کہ حل والوں کا حکم حرم میں داخلہ کے لیے آفاقی والا ہے۔ اس باب میں بلحاظ نظر یہی حکم ہے اور یہ امام ابوحنیفہ ‘ ابو یوسف ‘ اور محمد رحمہم اللہ کے قول کے خلاف ہے۔ انھوں نے ان روایات کو دلیل بنایا ہے۔