٤٠٩٣: مسروق نے روایت کی ہے کہ میں نے عائشہ (رض) سے دریافت کیا بعض لوگ یہاں ہدی کو بیت اللہ کی طرف روانہ کرتے ہیں اور وہ ان لوگوں کو جن کے ساتھ ہدی روانہ کرتے باقاعدہ دن متعین کرتے ہیں پھر خود احرام کی حالت میں رہتے ہیں یہاں تک کہ حج والے حلال ہوجائیں۔
مسروق کہتے ہیں کہ میں نے خود سنا کہ انھوں نے پردے کے پیچھے اپنے ہاتھ پر ہاتھ مارا اور کہنے لگیں۔ (تعجباً ) سبحان اللہ میں جناب رسول اللہ (صلی اللہ علیہ وآلہ وسلم) کے ہدی کے قلادے اپنے ہاتھ سے بنتی تھی اور آپ (صلی اللہ علیہ وآلہ وسلم) اس کو کعبہ کی طرف روانہ کرتے تھے اور خود گھر میں مقیم رہتے اور جو چیز اللہ تعالیٰ نے حلال بنائی ہے ان میں سے کسی بھی چیز کو لوگوں کے لوٹنے تک ترک نہ فرماتے تھے۔
تخریج : بخاری فی الحج باب ١٠٧؍١١٠‘ مسلم فی الحج ٣٥٩؍٣٦٠‘ ابو داؤد فی المناسک باب ١٦‘ ترمذی فی الحج باب ٧٠‘ نسائی فی المناسک باب ٦٥؍٦٩‘ ابن ماجہ فی المناسک باب ٩٤‘ دارمی فی المناسک باب ٨٦۔