٤٢١٥: حضرت عروہ نے حضرت عائشہ (رض) سے روایت کی ہے کہ جب بنو مصطلق کے قیدی جناب رسول اللہ (صلی اللہ علیہ وآلہ وسلم) نے پا لیے اور ان کو تقسیم کردیا تو جویریہ بنت حارث (رض) ثابت بن قیس بن شماس یا ان کے بھتیجے کے حصہ میں آئیں انھوں نے اس سے مکاتبت کرلی۔ حضرت عائشہ (رض) فرماتی ہیں کہ یہ شیریں گفتار عورت تھیں اس کو جو بھی دیکھ پاتا وہ اس کے دل میں اتر جاتیں۔ پس وہ جناب رسول اللہ (صلی اللہ علیہ وآلہ وسلم) کی خدمت میں بدل کتابت میں اعانت کے لیے حاضر ہوئیں جوں ہی میں نے اس کو جناب رسول اللہ (صلی اللہ علیہ وآلہ وسلم) کے حجرہ کے دروازہ پر دیکھا تو مجھے ان کی آمد ناپسند ہوئی میں نے اسی وقت بھانپ لیا کہ جناب رسول اللہ (صلی اللہ علیہ وآلہ وسلم) اس کی وہی باتیں دیکھ پائیں گے جو میں نے دیکھیں وہ کہنے لگیں یارسول اللہ (صلی اللہ علیہ وآلہ وسلم) میں جویریہ بنت حارث بن ابی ضرار سردار قبیلہ کی بیٹی ہوں مجھ پر جو مصیبت آئی ہے وہ آپ پر مخفی نہیں چنانچہ میں ثابت بن قیس بن شماس یا اس کے بھتیجہ کے حصہ میں آئی ہوں اور میں نے ان سے مکاتبت کرلی ہے میں آپ کی خدمت اقدس میں بدل کتابت کی ادائیگی میں معاونت کی غرض سے حاضر ہوئی ہوں آپ نے فرمایا کیا تم اس سے بہتر میں رغبت رکھتی ہو اس نے پوچھا یارسول اللہ (صلی اللہ علیہ وآلہ وسلم) وہ کیا ہے آپ (صلی اللہ علیہ وآلہ وسلم) نے فرمایا تمہارا بدل کتابت ادا کر کے میں تم سے شادی کرلیتا ہوں انھوں نے منظور کرلیا ۔ آپ نے فرمایا میں نے بدل کتابت ادا کردیا (یعنی اس کی بات طے کرلی) لوگوں میں اسی وقت یہ خبر پھیل گئی کہ جناب رسول اللہ (صلی اللہ علیہ وآلہ وسلم) نے جویریہ بنت الحارث سے نکاح کرلیا ہے تو سب نے کہا وہ جناب رسول اللہ (صلی اللہ علیہ وآلہ وسلم) کے سسرالی رشتہ دار بن گئے ہیں پس انھوں نے اپنے ہاں کے تمام قیدی آزاد کردیئے۔ حضرت عائشہ (رض) فرماتی ہیں ان کے نکاح سے بنو مصطلق کے سو گھرانے آزاد ہوگئے ہم جویریہ سے بڑھ کر اپنی قوم کے لیے کسی عورت کو زیادہ باعث برکت نہیں سمجھتے۔ پس حضرت عائشہ (رض) نے اس آزادی کی نوعیت خوب واضح کردی جس کا تذکرہ روایت ابن عمر (رض) میں موجود ہے کہ اس آزادی کے بدلے میں آپ نے ان سے نکاح کیا اور اس کو مہر قرار دیا اس کی کیفیت کیا تھی دراصل وہ ان کی طرف سے بدل کتابت کی ادائیگی تھی جس پر انھوں نے آزادی کے لیے مکاتبت کی تھی پھر وہ آزادی جو جناب رسول اللہ (صلی اللہ علیہ وآلہ وسلم) کے مال کتابت کی ادائیگی سے حاصل ہوئی تھی وہ ان کا مہر قرار پائی جس کا تذکرہ ابن عمر (رض) کی روایت میں موجود ہے جناب رسول اللہ (صلی اللہ علیہ وآلہ وسلم) کے سوا کسی کو اس بات کی اجازت نہیں کہ وہ کسی مکاتب کو اس کا بدل کتابت ادا کر دے اور یہ آزادی بدل کتابت ادا کرنے والے کی طرف سے مہر قرار پائے اور ہ وہ عورت مکاتبہ اس کی بیوی بن جائے۔ پس جب اس کو مہر قرار دینا آپ کی خصوصیت ہے تو امت کے لیے جائز نہیں تو جس آزادی کی آپ کو ولایت حاصل ہوئی اس کو مہر قرار دینا بھی آپ کے ساتھ خاص تھا امت کے لیے جائز نہیں۔ آثار کے انداز سے ہم نے اس باب کی صورت پیش کردی اب طریق نظر ملاحظہ ہو۔ امام ابو یوسف (رح) کہتے ہیں میرے ہاں قیاس کا تقاضا یہ ہے کہ جس عورت کو اس شرط پر آزادی ملے کہ اس کی آزادی ہی مہر ہو اور اس کے ساتھ اور کچھ نہ ہو تو ہم دیکھتے ہیں کہ جب آزادی اس شرط پر واقع ہوئی ہے کہ وہ عورت اس آزاد کنندہ سے نکاح کرے گی پھر وہ عورت نکاح سے انکاری ہوگئی تو اب عورت پر لازم ہے کہ وہ ادائیگی قیمت کے لیے محنت و مشقت کرے کیونکہ نکاح سے انکار کی صورت میں جس چیز کے لیے اس پر محنت و مشقت لازم ہوئی ہے یہی چیز اس کے لیے مہر قرار پاتی اگر وہ نکاح سے انکار نہ کرتی۔ اگر وہ مرد (نکاح کی صورت میں) جماع کے بعد طلاق دے تو عورت پر نصف قیمت کے لیے مال کمانا ضروری ہوگا اس بات کو حضرت حسن بصری (رح) نے بھی ذکر فرمایا ہے جیسا کہ مندرجہ ذیل روایت سے ظاہر ہوتا ہے۔
تخریج : ابو داؤد فی العتاق باب ٢‘ مسند احمد ٦؍٢٧٧۔