٤٢٦٢: معمر بن ابی حبیبہ نے عبداللہ بن عدی بن خیار (رض) سے روایت کی ہے کہ حضرت عمر (رض) کی موجودگی میں صحابہ کرام (رض) نے عزل کے مسئلہ میں باہم گفتگو کی تو ان کے درمیان اختلاف ہوا۔ حضرت عمر (رض) نے فرمایا تم لوگ اختلاف کرتے ہو حالانکہ تم منتخب شدہ اہل بدر ہو تمہارے بعد والے لوگوں کا اس سلسلہ میں کیا حال ہوگا اس دوران دو آدمی باہمی سرگوشی کرنے لگے تو حضرت عمر (رض) نے فرمایا یہ سرگوشی کیا ہے ؟ کسی نے کہا یہود کا خیال یہ ہے کہ یہ چھوٹے قسم کا زندہ درگور کرنا ہے تو حضرت علی (رض) نے فرمایا یہ زندہ درگور کرنا نہیں یہاں تک کہ تم سات باروں سے گزر جاؤ اور آپ نے استشہاد میں یہ آیت تلاوت فرمائی۔ ولقد خلقناالانسان من سلالۃ من طین سورة المؤمنون ١٢ سے آیت کے آخر تک۔ تو حضرت علی (رض) نے بتلایا کہ زندہ درگور وہاں ہوتا ہے جہاں پہلے سے روح پھونکی جا چکی ہو اور اس سے پہلے پہلے جب تک اس میں روح پھونکی نہیں جاتی وہ بےجان ہے زندہ درگور نہیں ہے۔ حضرت علی (رض) کے قول کے مشابہ ابن عباس (رض) کا قول بھی موجود ہے۔