٤٢٩٨: عطاء بن یسار نے حضرت ابو سعید خدری (رض) سے نقل کیا ہے کہ ایک شخص نے اپنی بیوی سے غیر فطری حرکت کی تو لوگوں نے اس کو ناپسند کیا اور کہا کہ تو اس کو ایسی عورت بنانا چاہتا ہے جس کا خاوند نہ ہو۔ اس پر اللہ تعالیٰ نے یہ آیت نازل فرمائی۔ نساؤکم حرث لکم فاتوا حرثکم انی شئتم (البقرہ ٢٢٣) امام طحاوی (رح) فرماتے ہیں کہ بعض لوگ اس طرف گئے ہیں کہ عورتوں سے غیر فطری فعل جائز ہے اور انھوں نے اس روایت سے استدلال کیا اور اس آیت کی تاویل کر کے اس کی اباحت کو ثابت کیا مگر دیگر علماء نے اس کی مخالفت کی اور اس کو حرام قرار دیا اور اس سے سخت منع کیا اور اس آیت کی تفسیر بھی دوسرے انداز سے کی۔ جو نیچے مذکور ہے۔ دوسری تفسیر یہ ہے۔
اس کے متعلق دو آراء ہیں :
نمبر 1: بعض لوگوں نے اس کو جائز کہا ہے اس کو محمد بن کعب قرظی ‘ مالک اور بعض شوافع نے اختیار کیا ہے۔
نمبر 2: جمہور فقہاء ‘ صحابہ وتابعین نے اس کو مکروہ و حرام قرار دیا ہے۔
فریق اوّل : نے اپنے مؤقف کے لیے مندرجہ روایت اور آیت نساؤکم حرث لکم۔۔۔ کے شان نزول سے استدلال کیا ہے۔