٤٧٧٧: علقمہ (رض) کی روایت ہے کہ ان سے بیوی کی لونڈی سے زنا کرنے والے کا حکم پوچھا گیا تو انھوں نے فرمایا مجھے کوئی پروا نہیں کہ بیوی کی لونڈی سے تم نے زنا کیا یا عوسجہ کی بیوی کی لونڈی سے زنا کیا برابر ہیں۔ یہ علقمہ (رح) ہیں یہ ابن مسعود (رض) کے افاضل شاگردوں سے ہیں انھوں نے ابن مسعود (رض) کا قول چھوڑ دیا حالانکہ عظمت میں وہ عبداللہ (رض) کو بلند مانتے ہیں۔ انھوں نے دوسروں کا قول اختیار کرلیا۔ ہمارے نزدیک اس کی وجہ یہ ہے کہ حضرت ابن مسعود (رض) نے جو بات اختیار کی تھی علقمہ (رح) کے ہاں اس کا نسخ ثابت تھا۔ پس ہم بھی یہی کہتے ہیں کہ جو شخص اپنی بیوی کی لونڈی سے جماع کرے اس کو حد لگائی جائے گی البتہ اتنی بات ضرور ہے کہ اگر وہ شبہ کا دعویٰ کرے مثلاً کہے کہ طننت انہا تحل لی وہ میرے گمان میں میرے لیے حلال تھی یا کہے کہ بیوی نے اسے میرے لیے حلال کردیا تو اس سے حد ساقط ہوجائے گی اور اس کو صرف تعزیر کی جائے گی۔ نیز مہر لازم ہوگا۔ یہ امام ابوحنیفہ ‘ ابو یوسف ‘ محمد (رح) کا قول ہے۔