٤٨٧٦: عروہ نے حضرت عائشہ (رض) سے روایت کی ہے کہ ایک عورت نے جناب رسول اللہ (صلی اللہ علیہ وآلہ وسلم) کے زمانہ میں فتح مکہ کے دنوں چوری کی تو جناب رسول اللہ (صلی اللہ علیہ وآلہ وسلم) نے اس کا ہاتھ کاٹنے کا حکم فرمایا حضرت اسامہ بن زید (رض) نے اس کے متعلق جناب رسول اللہ (صلی اللہ علیہ وآلہ وسلم) سے بات کی تو غصہ سے جناب رسول اللہ (صلی اللہ علیہ وآلہ وسلم) کا چہرہ مبارک بدل گیا تو آپ نے فرمایا کیا تم اللہ تعالیٰ کی حدود میں سے ایک حد کے متعلق سفارش کرتے ہو ؟ حضرت اسامہ نے عرض کی یارسول اللہ (صلی اللہ علیہ وآلہ وسلم) آپ مجھے معاف فرما دیں۔
جب پچھلا پہر ہوا تو جناب رسول اللہ (صلی اللہ علیہ وآلہ وسلم) نے اللہ تعالیٰ کی خوب تعریف کی جس کا وہ حقدار ہے پھر فرمایا اما بعد ! تم سے پہلے لوگ اس وجہ سے ہلاکت کا شکار ہوئے کہ ان میں جب کوئی بڑا آدمی چوری کرتا اس کو چھوڑ دیتے اور جب کوئی کمزور آدمی چوری کرلیتا تو اس پر حد قائم کرتے مجھے اس ذات کی قسم ہے جس کے قبضہ میں میری جان ہے اگر بالفرض فاطمہ بنت محمد (صلی اللہ علیہ وآلہ وسلم) چوری کرتی تو میں اس کا ہاتھ بھی کاٹ دیتا۔ پھر آپ نے اس عورت کے متعلق حکم دیا جس نے چوری کی تھی پس اس کا ہاتھ کاٹ ڈالا گیا۔
تخریج : بخافی فی الحدود باب ١٢‘ مسلم فی الحدود ٨؍٩‘ ابو داؤد فی الحدود باب ٤‘ ترمذی فی الحدود باب ٦‘ نسائی فی السارق باب ٦‘ ابن ماجہ فی الحدود باب ٦‘ دارمی فی الحدود باب ٥۔