٥٠٩٣: قیس بن مسلم کہتے ہیں کہ میں نے حسن بن محمد بن علی سے اللہ تعالیٰ کے اس ارشاد کے متعلق دریافت کیا واعلموا انما غنمتم من شئی فان اللہ خمسہ “ (الانفال ٤١) تو کہنے لگے فان اللہ خمسہ سے تو کلام کو شروع فرمایا عبارت اس طرح ہے ” اللہ الدنیا والآخرہ وللرسول ولذی القربٰی والیتامٰی والمساکین ای خمسہ “ دنیا و آخرت اللہ تعالیٰ کی ہے رسول اللہ (صلی اللہ علیہ وآلہ وسلم) اور قرابت داروں اور یتامی اور مساکین کے لیے خمس ہے۔ جناب رسول اللہ (صلی اللہ علیہ وآلہ وسلم) کی وفات کے بعد صحابہ کرام اس بارے میں مختلف ہوئے۔ ایک جماعت کہتی تھی کہ رشتہ داروں کا حق خلیفہ کی قرابت کی وجہ سے ہے۔ بعض نے کہا کہ جناب رسول اللہ (صلی اللہ علیہ وآلہ وسلم) کے بعد آپ کا حصہ خلیفہ وقت کے لیے ہوگا۔ پھر اس بات پر سب متفق ہوگئے کہ ان دونوں حصوں کو گھوڑوں اور جہاد کی تیاری کے لیے صرف کیا جائے۔ چنانچہ حضرت ابوبکر و عمر (رض) کی خلافت میں یہی طریق رائج رہا۔ ذرا غور فرمائیں کہ یہ صحابہ کرام کا متفقہ فیصلہ ہے اور یہ حصہ ان گھوڑوں اور اسلحہ کی طرف لوٹتا ہے۔ جس کو دشمن کے بالمقابل مسلمانوں نے تیار کیا ہے اور اگر یہ جناب رسول اللہ (صلی اللہ علیہ وآلہ وسلم) کی قرابت کی وجہ سے حصہ مقرر ہوتا تو وہ اس کو نہ روکتے اور اس کو قطعاً کسی دوسرے مصرف میں نہ لگاتے اور یہ بات حسن بن محمد (رح) جیسے مستند علم کے شہ سوار پر ہرگز مخفی نہ رہتی۔ حضرت ابن عباس (رض) نے نجدہ کے خط کے جواب میں ذی القربیٰ کا حصہ دریافت کرنے پر یہی بات فرمائی۔ روایت یہ ہے۔