٥٣١٥: مالک بن اوس (رض) سے روایت ہے کہ میں حضرت عمر (رض) کے پاس بیٹھا تھا اچانک حضرت علی (رض) اور عباس (رض) جھگڑتے ہوئے آئے حضرت عباس (رض) نے کہا اے امیرالمؤمنین میرے اور اس کے مابین جو ایسا۔ ایسا ہے ضرور فیصلہ فرمائیں۔ حماد راوی کہتے ہیں کہ میں کلام سے کنایہ کرتا ہوں۔ تو حضرت عمر (رض) کہنے لگے میں اللہ کی قسم تمہارے مابین ضرور فیصلہ کروں گا۔ جب جناب رسول اللہ (صلی اللہ علیہ وآلہ وسلم) کی وفات ہوئی اور ابوبکر (رض) آپ کے صدقہ کے ذمہ دار بنے تو وہ اس پر مضبوط رہے اور انھوں نے اس میں امانت کو ادا کیا اس شخص کو خیال ہوا کہ انھوں نے خیانت کی اور گناہ کیا۔ ایوب راوی نے یہ بات نقل کی ہے اور اللہ تعالیٰ جانتے ہیں کہ انھوں نے نہ خیانت کی اور نہ بکواس کی اور اس طرح کیا۔ حماد کہتے ہیں کہ ہمیں عمرو بن دینار نے مالک سے اور بہت سے روات نے زہری سے روایت کی ہے کہ انھوں نے کہا ابوبکر اس بات میں ہدایت پر تھے اور حق کی اتباع کرنے والے تھے۔ پھر ایوب والی روایت کے الفاظ کی طرف رجوع کیا کہ جب حضرت ابوبکر (رض) کی وفات ہوئی اور میں اس صدقے کا ان کے بعد ذمہ دار بنا۔ تو میں اس پر مضبوط رہا اور اس میں امانت ادا کرتا رہا اور ان کو خیال ہوا کہ میں نے خیانت کی اور گناہ کیا حالانکہ اللہ تعالیٰ جانتا ہے کہ میں نے نہ خیانت کی اور نہ گناہ میں مبتلا ہوا اور نہ وہ کلمہ کہا۔ روایت عمرو عن الزہری میں ہے ‘ میں اس میں سیدھی راہ چلنے والا تھا پھر عکرمہ کی روایت کی طرف بات لوٹ آتی ہے کہ یہ دونوں حضرات آئے اور مجھے کہنے لگے تم جناب رسول اللہ (صلی اللہ علیہ وآلہ وسلم) کے صدقہ کو ہمارے حوالہ کرو میں نے وہ ان کے حوالے کردیا پھر اس نے اس کو کہا میرے بھتیجے کی طرف سے میرا حصہ دے دو اور اس نے اس کو کہا میری بیوی کا حصہ جو ان کے والد کی طرف سے بنتا ہے وہ دے دو حالانکہ اس کو معلوم ہے کہ اللہ تعالیٰ کے پیغمبر کی وراثت نہیں ہوتی جو چھوڑ جائیں صدقہ ہوتا ہے۔ روایت عمرو عن الزہری میں ہے بیشک میں نے جناب رسول اللہ (صلی اللہ علیہ وآلہ وسلم) کو فرماتے سنا ہماری وراثت نہیں ہوتی جو ہم چھوڑتے ہیں وہ صدقہ ہوتا ہے۔ پھر روایت عکرمہ کی طرف بات لوٹی۔ کہ پھر حضرت عمر (رض) نے یہ آیت تلاوت فرمائی انماالصدقات للفقراء والمساکین والعاملین علیھا (التوبہ : ٦٢) بیشک صدقات فقراء مساکین اور عمال کا حق ہے۔ پھر عمر (رض) نے فرمایا یہ صدقات ان کا حق ہیں (جن کا آیت میں ذکر ہے) کہ حضرت عمر (رض) نے یہ آیت پڑھی ” ما افاء اللہ علی رسولہ منہم فما اوجفتم علیہ من خیل ولا رکاب الی آخر الایۃ “ کہ جو اللہ نے اپنے رسول (صلی اللہ علیہ وآلہ وسلم) کو بطور فئی عنایت فرمایا پس تم اس پر گھوڑے اور اونٹ چڑھا کر نہیں لے گئے۔ پھر یہ جناب رسول اللہ (صلی اللہ علیہ وآلہ وسلم) کے لیے خاص تھا کہ جس پر مسلمانوں نے گھوڑے اور اونٹ نہیں دوڑائے۔ پس آپ اس سے اپنی اور اہل و عیال کا خرچہ لیتے اور بقیہ مال اپنے گھر والوں کے لیے رکھ لیتے۔ پھر روایت حدیث ایوب کی طرف لوٹی۔ پھر انھوں نے یہ آیت تلاوت کی :” ما افاء اللہ الی اولپک ہم الصادقون “ (الحشر : ٧) آیت کے آخر تک۔ (کہ وہی لوگ سچے ہیں) پھر یہ آیت تلاوت کی ” للفقراء المہاجرین الذین اخرجوا من دیارہم واموالہم “ (الحشر : ٨) ” اولئک ہم الصادقون “ (الحشر : ٨) پس یہ مہاجرین ہیں پھر آیت : ” والذین تبوا الدار “ پڑھی یہاں تک کہ حماد ” فاولئک ہم المفلحون “ (الحشر : ٩) تک پہنچے پس یہ انصار ہیں راوی کہتے ہیں پھر پڑھا والذین جاء وا من بعدہم “ (الحشر : ١٠) یہاں تک کہ ” رؤف رحیم “ (الحشر : ١٠) تک پہنچے۔ پھر حضرت عمر (رض) نے فرمایا اس آیت نے تمام مسلمانوں کے لیے حق کو ثابت کردیا سوائے ان غلاموں کے جن کے وہ مالک ہوں۔ اگر میں زندہ رہا تو (ان شاء اللہ) تو کوئی مسلمان ایسا باقی نہ رہے گا جس کو میں حصہ نہ دوں یہاں تک بھیڑوں کا ریوڑ چرانے والے کو بھی اس کا حق دوں گا۔ آپ نے حظ یا حق کا لفظ استعمال فرمایا دونوں کا معنی ایک ہے۔ اس روایت میں حضرت عمر (رض) نے آیت واعلموا انما غنمتم۔۔۔تلاوت فرمائی پھر فرمایا یہ غنیمت ان لوگوں کے لیے ہے۔ اس سے یہ بات ثابت ہوگئی کہ ذوی القربیٰ کا حصہ ان کے ہاں جناب رسول اللہ (صلی اللہ علیہ وآلہ وسلم) کی وفات کے بعد بھی ثابت تھا۔ جیسا کہ آپ کی حیات مبارکہ میں ثابت تھا۔ اس روایت میں جو تم نے پیش کی تمہارے مستدل کی کوئی گنجائش نہیں اور دلیل کیسے بنتی جبکہ حضرت ابن عباس (رض) کا وہ خط موجود ہے جو انھوں نے نجدہ حاکم یمامہ کے استفسار کے جواب میں لکھا۔ اس میں صاف موجود ہے کہ حضرت عمر (رض) نے ہمیں بلایا تاکہ وہ اس مال میں سے ہمارے رنڈوں کا نکاح کریں اور ہمارے بلاپوشاک لوگوں کو لباس پہنائیں تو ہم نے وہ لینے سے انکار کردیا۔ تو یہ ابن عباس (رض) بتلا رہے ہیں کہ حضرت عمر (رض) نے ذوی القربیٰ کا حصہ ان کو دینے سے انکار فرمایا کیونکہ ان کے نزدیک یہ ان حضرات کا حق نہ بنتا تھا تو اس بات کے ہوتے ہوئے پھر یہ دعویٰ مالک بن اوس (رض) کی روایت سے کس طرح کیا جاسکتا ہے کہ وہ وفات رسول اللہ (صلی اللہ علیہ وآلہ وسلم) کے بعد اس حصے کے قائل تھے۔ بلکہ اس روایت سے تو یہ بات ثابت ہوتی ہے کہ یہ حصہ ان لوگوں کے لیے ہے یعنی جب اللہ تعالیٰ نے یہ آیت جناب رسول اللہ (صلی اللہ علیہ وآلہ وسلم) پر نازل فرمائی تو اس وقت یہ ان کا حصہ تھا جیسا کہ اللہ تعالیٰ نے ان کے لیے مقرر فرمایا۔ جس طرح کہ جناب رسول اللہ (صلی اللہ علیہ وآلہ وسلم) کے حصہ کی اضافت آپ کی طرف فرمانے کا معنی بھی یہی ہے کہ وہ آپ کی حیات مبارکہ میں تھا اور آپ کی وفات کے بعد آپ کے لیے نہ تھا بلکہ آپ کی زندگی میں تو جاری تھا مگر وفات شریفہ سے منقطع ہوگیا بالکل اسی طرح جو کچھ آپ کے قرابت داروں کی طرف منسوب ہوا وہ بھی آپ کی حیات طیبہ تھا ‘ میں آپ کی وفات طیبہ سے یہ حصہ مرتفع (ختم) ہوگیا۔ تو جس طرح حضرت عمر (رض) کے قول کہ یہ ان لوگوں کے لیے ہے ‘ اس سے جناب رسول اللہ (صلی اللہ علیہ وآلہ وسلم) کے حصہ کا اس وقت تک کے لیے باقی رہنا لازم نہیں آتا جس وقت اس حصہ کے متعلق کہا گیا جو کہا گیا تو اسی طرح عمر (رض) کے قول فہی لھؤلاء۔ سے ذوالقربیٰ کے حصہ کا اس وقت تک کے لیے باقی رہنا لازم نہیں آتا جس میں اس کے متعلق وہ کہا گیا جو کہا گیا۔ حضرت مالک بن اوس کی یہ روایت عبداللہ بن عباس (رض) کی اس روایت کے جو ذوی القربیٰ کے حصہ سے متعلق ہے یہ روایت مخالف اور معارض ہے اور صحیح معارض ہے۔ (پس اس پر اعتراض باطل ہوا)