٥٣١٩: عیسیٰ بن عاصم نے زاذان سے روایت کی ہے کہ ہم حضرت علی (رض) کے پاس موجود تھے۔ ہم نے باہمی خیار عورت کے متعلق مذاکرہ کیا تو فرمانے لگے امیرالمؤمنین عمر (رض) نے اس سلسلہ میں مجھ سے پوچھا تو میں نے کہا اگر وہ عورت اپنے خاوند کی طرف لوٹ آئے تو ایک طلاق رجعی ہے اور وہ خاوند اس کا زیادہ حقدار ہے اور اگر وہ عورت اپنے نفس کو اختیار کرے تو ایک بائنہ طلاق ہوگی۔ تو حضرت عمر (رض) نے فرمایا یہ اس طرح نہیں بلکہ اس طرح ہے کہ اگر وہ اپنے نفس کو اختیار کرے تو ایک طلاق رجعی ہوگی اور وہ خاوند اس کا سب سے زیادہ حقدار ہوگا اور اگر وہ اپنے خاوند کو اختیار کرلیتی ہے تو اس پر کچھ نہیں (کوئی طلاق ہی نہیں) تو اس وقت میرے لیے امیرالمؤمنین کی اتباع کے علاوہ چارہ نہ تھا۔ اب جبکہ معاملہ میرے پاس آیا ہے اور میں یہ سمجھتا ہوں کہ کل مجھ سے ان شرمگاہوں کے متعلق سوال ہوگا تو میں نے اپنے اجتہاد کو اختیار کیا۔ اس پر ان کے بعض ساتھیوں نے کہا اگر امیرالمؤمنین تمہاری رائے پر چلتے تو یہ بات مجھے زیادہ پسند تھی کہ آپ اپنی تنہا رائے پر چلتے تو انھوں نے فرمایا۔ سنو صاحب ! حضرت عمر (رض) نے زید بن ثابت (رض) کی طرف آدمی بھیج کر دریافت کیا تو انھوں نے میری اور ان کی رائے کے خلاف رائے دی انھوں نے کہا اگر وہ عورت اپنے خاوند کو اختیار کرے تو ایک طلاق رجعی اور وہ خاوند اس کا دوسروں سے زیادہ حقدار ہے اور اگر وہ عورت اپنے نفس کو پسند کرلیتی ہے تو تین واقع ہوجائیں گی اور وہ عورت اور خاوند سے نکاح کے بغیر اس کے لیے حلال نہ ہوگی۔ معترض کو نظر نہیں آتا کہ حضرت علی (رض) نے اس ارشاد میں یہ خبر دی کہ جب ان کو حکومت ملی تو انھوں نے عورتوں کے سلسلہ میں اپنی ذمہ دار خیال کرتے ہوئے کہ وہ مسؤل ہیں اپنے اجتہاد پر عمل کیا اور جس بات میں حضرت عمر (رض) کی رائے خلاف رائے تھی اس پر ان کی تقلید کو جائز قرار نہیں دیا۔ تو اب جب آپ کو خلافت ملی تو یہ ناممکن ہے کہ اللہ تعالیٰ کی معرفت اور اس کا علم رکھنے کے باوجود وہ اموال کے سلسلہ میں مسؤل ہونے کے باوجود غیر مستحق لوگوں کو دیتے رہے اور اہل لوگوں سے روک لیا۔ ازخود ثابت ہوا کہ ان کا قول قرابت داروں کے سلسلہ میں ان کے قول کے موافق تھا فلہذا انھوں نے اسی حکم کو جاری رکھا اس کے علاوہ کو اختیار نہیں کیا۔ امام ابوحنیفہ ‘ ابو یوسف ‘ محمد (رح) کے متعلق مشہور یہی ہے کہ وہ اسی بات کے قائل تھے کہ جناب رسول اللہ (صلی اللہ علیہ وآلہ وسلم) کی وفات کے بعد قرابت داروں کا حصہ منقطع ہوگیا اور مال فئی اور خمس غنائم اب تین حصوں میں بانٹیں گے۔ یتامیٰ ۔ محتاج۔ مسافر۔ جیسا یہ اثر ہے۔