٥٣٢٣: محمد بن مسلم بن شہاب زہری وغیرہ کہتے ہیں کہ جناب رسول اللہ (صلی اللہ علیہ وآلہ وسلم) نے قریش سے حدیبیہ والے سال اس شرط پر صلح کی کہ جو قبیلہ چاہے جناب رسول اللہ (صلی اللہ علیہ وآلہ وسلم) کے ساتھ معاہدے میں شامل ہوجائے اور جو آدمی چاہے وہ عقد قریش میں داخل ہو۔ تو بنو خزاعہ اور بنو کعب وغیرہ اور ان کے حامی قبائل کود پڑے اور کہنے لگے ہم جناب رسول اللہ (صلی اللہ علیہ وآلہ وسلم) کے عقد اور عہد میں شامل ہوتے ہیں قریش نے اس معاہدے کی ایک سال اور دوسرے سال کا کچھ حصہ پاسداری کی۔ پھر اسفل مکہ میں بنو بکر نے بنو خزاعہ کے مال پر حملہ کر کے لوٹ لیا۔ زبیر نے کہا ان پر رات کو حملہ کر دو ۔ چنانچہ انھوں نے ان کے ایک آدمی کو مار ڈالا وہ لوگ آگے بڑھے اور باہمی لڑنے لگے۔ قریش نے اسلحہ سے بنو بکر کی امداد کی اور قریش نے خفیہ طور پر تیروں کے ذریعہ لڑائی میں شرکت کی۔ یہاں تک کہ بنو خزاعہ حرم تک پہنچ گئے اس وقت بنو بکر کا سپہ سالار نوفل بن معاویہ تھا۔ جب وہ حرم تک پہنچے تو بنو بکر کہنے لگے اے نوفل۔ ہلاکت سے بچ۔ ہلاکت سے بچ۔ اب ہم حرم میں داخل ہوچکے۔ تو اس نے بڑی بری بات کہی۔ آج اس کا کوئی معبود نہیں۔ اے بنی بکر تم اپنا بدلہ چکاؤ اسلام سے پہلے بنو خزاعہ نے ان کے تین آدمی قتل کئے تھے اور وہ لڑائی سے الگ تھے ان کے نام یہ تھے
نمبر ١ ذویب۔
نمبر ٢ کلثوم۔
نمبر ٣ سلیمان بن اسود بن زریق یعمری۔ اے بنی بکر۔ میری عمر کی قسم ! اگرچہ تم حرم میں پہنچ رہے ہو کیا تم اس میں اپنا بدلہ نہ لو گے ؟ راوی کہتے ہیں کہ انھوں نے بنو خزاعہ کے ایک آدمی کو مقام و تیر میں شب خون مار کر قتل کردیا تھا اس وقت اس کے ساتھ اس کی قوم کا ایک منبّہ نامی آدمی تھا وہ اکیلا آدمی تھا چنانچہ وہ اور تمیم دونوں نکلے۔ منبّہ نے کہا اے تمیم تم اپنے آپ کو بچاؤ‘ اللہ کی قسم ! میں مارا جاؤں گا۔ خواہ وہ مجھے قتل کریں یا اور کچھ۔ تمیم چلا گیا انھوں نے منبّہ کو پا کر قتل کردیا اور تمیم بچ نکلا۔ جب وہ مکہ میں داخل ہوا تو بدیل بن ورقاء اور ان کے غلام رافع سے ملا اور عمرو بن سالم خزاعی وہاں سے نکلا اور جناب رسول اللہ (صلی اللہ علیہ وآلہ وسلم) کی خدمت میں حاضر ہو کر کھڑا ہوگیا اس وقت جناب رسول اللہ (صلی اللہ علیہ وآلہ وسلم) مسجد میں تشریف فرما تھے اور اس نے یہ اشعار پڑھے جن کا ترجمہ یہ ہے۔
نمبر 1: اے اللہ ! میں حضرت محمد (صلی اللہ علیہ وآلہ وسلم) کو اپنا اور اپنے دادا کا پرانا عہد یاد دلاتا ہوں۔
نمبر 2: ہم تمہارے لیے باپ کی جگہ تھے اور تم بیٹوں کی جگہ بلاشبہ قریش نے اپنے عہد کو توڑ ڈالا ہے۔
نمبر 3: اور آپ کے پکے وعدے کو توڑ دیا ہے اور انھوں نے میرے لیے بھی مقام کداء میں مورچہ بنایا۔
نمبر 4: اے اللہ کے رسول آپ مضبوط مدد کریں اللہ کے بندوں کو بلاؤ وہ مدد کے لیے آئیں گے۔
نمبر 5: ہم وہاں اسلام لائے اور آج تک بیعت سے ہاتھ نہیں کھینچا۔ اے اللہ کے رسول (صلی اللہ علیہ وآلہ وسلم) ہماری مضبوط مدد فرمائیں۔
نمبر 6: اللہ تعالیٰ کے بندوں کو بلاؤ۔ وہ مدد کے لیے آئیں گے۔
نمبر 7: ان میں اللہ کا رسول ہے جنہوں نے تلوار کو سونتا ہے اگر کسی نے ذلت کا ارادہ کیا تو آپ کا چہرہ محفوظ کردیا جاتا ہے۔
نمبر 8: وہ بہت بڑے لشکر میں ہیں جو جھاگ مارنے والے سمندر کی طرح ہے۔
نمبر 9: اور ان کا خیال یہ تھا کہ میں کسی کو نہ بلاؤں گا حالانکہ وہ زیادہ ذلیل اور عدد میں کم ہیں۔
نمبر 10: تہجد کے وقت مقام و تیر میں انھوں نے ہم پر شب خون مار کر رکوع و سجدہ میں ہمیں قتل کردیا۔ جناب رسول اللہ (صلی اللہ علیہ وآلہ وسلم) نے فرمایا بنی کعب کی مدد کی جائے گی پھر بدیل بن ورقاء بنو خزاعہ کے ایک وفد کے ساتھ جناب رسول اللہ (صلی اللہ علیہ وآلہ وسلم) کی خدمت میں مدینہ حاضر ہوئے اور اپنے اوپر گزری ہوئی واردات سنا کر واپس آگئے آپ (صلی اللہ علیہ وآلہ وسلم) نے فرمایا تمہارے پاس ابو سفیان معاہدے کی طوالت اور مدت میں اضافے کے لیے آئے گا۔ پھر اسی قسم کی روایت بیان کی کہ ابو سفیان نے حضرت ابوبکر ‘ عمر اور علی المرتضیٰ ‘ فاطمہ الزہراء (رض) اجمعین کے ساتھ بات کی اور ان حضرات نے جو جوابات دیئے وہ ذکر کئے۔ ایوب نے اپنی روایت میں ابو سفیان کی عباس (رض) سے گفتگو اور ان امن دینے اور ان کے اسلام لانے کا تذکرہ نہیں کیا اور نہ ہی حدیث کا باقی حصہ نقل کیا ہے۔ امام طحاوی فرماتے ہیں ‘ ان دونوں احادیث سے معلوم ہوتا ہے کہ وہ صلح جو جناب رسول اللہ (صلی اللہ علیہ وآلہ وسلم) اور اہل مکہ میں ہوئی بنو خزاعہ قبیلہ اس میں داخل ہوگیا اس لیے کہ وہ پہلے سے آپ کے حلیف چلے آ رہے تھے اور بنو بکر قریش کی صلح میں شامل ہوگئے کیونکہ ان کے اور قریش کے مابین پہلے سے معاہدہ چلا آ رہا تھا اور ہر فریق کے حلیف کا حکم بھی اصل معاہدہ کرنے والوں جیسا ہوگیا جناب رسول اللہ (صلی اللہ علیہ وآلہ وسلم) کے حلفاء اور قریش کے حلفاء میں لڑائی ہوگئی اس سے حلفاء قریش اس معاہدے سے خارج ہوگئے اس سے وہ جناب رسول اللہ (صلی اللہ علیہ وآلہ وسلم) اور آپ کے صحابہ کرام کے خلاف لڑنے والے بن گئے پھر اس سے بڑھ کر قریش نے اپنے حلفاء کی امداد کر کے ان کو بنو خزاعہ کے قتل کے لیے تقویت پہنچائی اور ان کے کئی آدمی مقتول ہوئے حالانکہ صلح اس کے لیے رکاوٹ تھی۔ پس ان کی یہ حرکت بھی نقص عہد تھا اور صلح سے نکلنا تھا اس سے قریش بھی آپ کے اور اصحاب کے محارب بن گئے۔ جو تم نے کہا یہ کیسے ہوسکتا ہے جب کہ ابو سفیان جبکہ ابو سفیان مدینہ منورہ میں جناب رسول اللہ (صلی اللہ علیہ وآلہ وسلم) کی خدمت میں آیا اور یہ حاضری بنو بکر و بنو خزاعہ کی لڑائی کے بعد تھی اور قریش اس سے قبل بنو بکر کی مدد کرچکے تھے جناب رسول اللہ (صلی اللہ علیہ وآلہ وسلم) کو ابو سفیان کی اس حالت کا علم تھا مگر اس کے باوجود نہ تو آپ نے صلہ رحمی فرمائی اور نہ ہی اس پر تعرض فرمایا تو کیا یہ اس بات کی کھلی دلیل نہیں کہ آپ کے نزدیک وہ امان میں تھا بنو بکر و بنو خزاعہ کی لڑائی کی وجہ سے وہ امان سے خارج نہ ہوا تھا اور قریش نے بنو بکر کی اسلحہ اور کھانے سے جو معاونت کی تھی اس کے باوجود وہ صلح ختم نہ ہوئی تھی۔ جو ان کے اور جناب نبی اکرم (صلی اللہ علیہ وآلہ وسلم) کے درمیان ہوئی تھی اور نہ وہ اس سے خارج ہوئے تھے۔ فریق اوّل کا کہنا ہے کہ جناب رسول اللہ (صلی اللہ علیہ وآلہ وسلم) کے ابو سفیان سے تعرض نہ کرنے کی وجہ یہ نہیں تھی کہ جو صلح آپ کے اور مکہ والوں کے درمیان ہوئی تھی وہ باقی تھی بلکہ آپ کے چھوڑنے کی وجہ یہ تھی کہ وہ آپ کی خدمت میں تجدید صلح کے لیے آیا تھا۔ کیونکہ پہلی صلح ٹوٹ چکی تھی (جیسا کہ روایات میں یہ بات واضح ہے) اس کی آمد کی غرض سے آپ نے بذریعہ وحی پہلے مطلع کیا) باقی قتل کے لیے تعرض نہ کرنے کی وجہ صلح کا نہ ٹوٹنا نہیں بلکہ یہ وجہ تھی کہ قاصدوں کو قتل نہیں کیا جاتا۔ جیسا مندرجہ ذیل روایت اس کی شاہد ہے۔
نوٹ : ان اشعار کو بیروت ‘ رحمانیہ کے نسخوں میں قدیمی کتب خانہ کے نسخہ سے مختلف نقل کیا گیا ہے ‘ ہم نے تمام کا ترجمہ کردیا ۔
(مترجم)