٥٣٢٩: ابن ابی الذئب نے سعید مقبری (رض) سے انھوں نے ابو مرہ مولیٰ عقیل سے انھوں نے ام ہانی (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے فتح مکہ کے دن غسل فرمایا پھر ایک کپڑے میں لپٹ کر جس کی دونوں اطراف ایک دوسرے کے خلاف ڈالنے والے تھے آپ نے آٹھ رکعت نماز ادا فرمائی۔ ذرا غور فرمائیں کہ جناب علی (رض) نے مکہ کے دو مخزومیوں کو قتل کرنا چاہا اگر اہل مکہ امان میں تھے تو حضرت علی (رض) ان کے قتل کے درپے نہ ہوتے اور ام ہانی (رض) کو انھیں امان دینے کی کیا ضرورت تھی کہ جس سے علی (رض) پر ان کا قتل حرام ہوجائے۔
نمبر ٢ ام ہانی (رض) نے حضرت علی (رض) کو یہ نہیں کہا کہ تم ان کو قتل نہیں کرسکتے کیونکہ یہ اور تمام اہل مکہ صلح اور امان میں ہیں۔ پھر ام ہانی (رض) نے علی (رض) کے طرز عمل اور اپنے پناہ دینے کا تذکرہ کیا تو جناب رسول اللہ (صلی اللہ علیہ وآلہ وسلم) نے ان کی پناہ کو تو بحال رکھا مگر علی (رض) کو ام ہانی کی امان سے پہلے ان کے ارادہ قتل پر کوئی ڈانٹ ڈپٹ نہیں فرمائی۔ اس سے یہ بات پایہ ثبوت کو پہنچ گئی اگر ام ہانی (رض) ان کو پناہ نہ دیتیں تو ان کا قتل درست تھا۔ اگر صلح قائم و دائم تھی تو پھر ان کا قتل محال و ناممکن تھا۔ اب اس سے زیادہ واضح اور کیا دلیل ہو کہ مکہ میں آپ کا داخلہ زور سے ہوا۔ پھر اس سے واضح تر روایت حضرت ابوہریرہ (رض) سے مروی ہے۔
تخریج : مسلم فی الجہاد ٨٤؍٨٥‘ ٨٦‘ مسند احمد ٢؍٥٣٨۔