٥٣٣١: ثابت بنانی نے روایت کو عبداللہ بن رباح سے انھوں نے حضرت ابوہریرہ (رض) سے نقل کیا ہے جناب رسول اللہ (صلی اللہ علیہ وآلہ وسلم) جب فتح مکہ کے لیے روانہ ہوئے تو آپ نے ابو عبیدہ بن جراح ‘ زبیر بن العوام ‘ خالد بن ولید (رض) کی سرکردگی میں لشکر روانہ فرمائے۔ جب ان کو روانہ کیا جا چکا تو آپ نے حضرت ابوہریرہ (رض) کو فرمایا تم انصار کو آواز دو ۔ انھوں نے اے نصار کے گروہ ! کہہ کر آواز دی جناب رسول اللہ (صلی اللہ علیہ وآلہ وسلم) کی بات سنو ! وہ اپنی عادت کے مطابق آئے پھر آپ نے فرمایا تم اس راستہ سے چلو۔ جس کا سامنا ہو اسے قتل کر دو ۔ جناب رسول اللہ (صلی اللہ علیہ وآلہ وسلم) چلتے رہے اللہ تعالیٰ نے فتح عنایت فرمائی۔ اس میں قتل ہونے والے چار آدمی تھے۔
ابوہریرہ (رض) کہتے ہیں کہ قریشی مشرک سردار کعبہ میں داخل ہوگئے ان کا خیال یہ تھا کہ وہ قتل سے نہ بچ سکیں گے آپ (صلی اللہ علیہ وآلہ وسلم) نے طواف کیا اور دو رکعت نماز ادا فرمائی پھر کعبہ شریف کے پاس آئے اور دروازے کی چوکھٹ کی دونوں جانبین پکڑ کر فرمایا تم کیا کہتے اور کیا گمان کرتے ہو ؟ انھوں نے کہا آپ بھائی ہیں اور مہربان حوصلہ مند چچا کے بیٹے ہیں جناب رسول اللہ (صلی اللہ علیہ وآلہ وسلم) نے فرمایا میں وہی بات کہتا ہوں جو حضرت یوسف (علیہ السلام) نے فرمائی تھی : { لاَ تَثْرِیْبَ عَلَیْکُمُ الْیَوْمَ ١ یَغْفِرُ اللّٰہُ لَکُمْ چ وَہُوَ اَرْحَمُ الرّٰحِمِیْنَ } (یوسف : ٩٢)
ابوہریرہ (رض) کہتے ہیں وہ بیت اللہ سے اس طرح نکلے گویا وہ قبور سے اٹھے ہیں۔ پھر وہ اسلام لے آئے۔
جناب رسول اللہ (صلی اللہ علیہ وآلہ وسلم) صفا کے قریبی دروازہ سے نکلے اور آپ نے صفا پر خطبہ دیا۔ انصار نچلی جانب وادی میں تھے وہ کہنے لگے اس شخص کو اپنی قوم پر نرمی نے آلیا اور قوم کی طرف میلان نے پا لیا۔
ابوہریرہ (رض) کہتے ہیں کہ اللہ تعالیٰ نے آپ پر وحی اتاری۔ آپ نے فرمایا : اے انصار ! کیا تم نے یہ کہا : اخذتہ الرافۃ بقومہ وادرکتہ الرغبۃ فی قرابتہ۔ اس صورت میں تو میں نبی نہ ہوں گا اللہ کی قسم میں اللہ تعالیٰ کا سچا رسول ہوں۔ میرا جینا مرنا تمہارے ساتھ ہے انھوں نے کہا یارسول اللہ (صلی اللہ علیہ وآلہ وسلم) اللہ کی قسم یہ بات آپ کی جدائی کے خطرے سے بخل کرتے ہوئے کہی۔ آپ نے فرمایا تم اللہ اور اس کے رسول کے ہاں سچے ہو۔۔ ابوہریرہ (رض) کا بیان ہے کہ ان میں کوئی ایسا نہ تھا کہ جس کا سینہ آنکھوں کے آنسوؤں کی وجہ سے جھکا نہ ہو۔
کیا اس معترض کو یہ معلوم نہیں ہوتا کہ جناب رسول اللہ (صلی اللہ علیہ وآلہ وسلم) کے مکہ میں داخلہ کے بعد کفار قریش کا گمان یہی تھا کہ وہ تلوار کی کاٹ سے بچ نہ سکیں گے یہ کس طرح ممکن ہے کہ جناب رسول اللہ (صلی اللہ علیہ وآلہ وسلم) کی طرف سے وہ امن وامان میں ہوں اور پھر ڈر رہے ہوں اللہ کی قسم ! یہ موقعہ تو آپ سے پھر ڈرنے کا نہیں تھا۔ لیکن وہ سمجھ گئے کہ آپ کی مرضی ہے کہ خواہ ان کو قتل کردیں یا احسان کر کے چھوڑ دیں اور اللہ تعالیٰ نے ان کو غلبہ دیا اور آپ کے قابو میں کردیا ہے ان کے متعلق اللہ تعالیٰ نے جو آپ کو پہلے یا بعد حکم دیا اسی طرح عمل پیرا ہوں گے اس کے بعد آپ (صلی اللہ علیہ وآلہ وسلم) نے ان کو معاف کردیا پھر ان کو یہ بھی فرمایا۔ آج کے دن کے بعد مکہ میں لڑائی نہ کی جائے گی۔ جیسا کہ اس روایت میں ہے۔