٥٥٢٤: قاسم بن محمد نے حضرت عائشہ (رض) سے روایت کی کہ بریرہ (رض) ان کی خدمت میں بدل کتابت میں معاونت کے لیے آئیں تو حضرت عائشہ (رض) نے فرمایا اگر تمہارے مالک چاہیں تو تمہیں نقد رقم یکمشت دے کر خرید لوں وہ اپنے مالکوں کے پاس گئیں اور ان کو یہ بات بتلائی تو انھوں نے ولاء کی شرط سے اس بات کو تسلیم کرنے کی بات رکھی حضرت عائشہ (رض) نے جناب رسول اللہ (صلی اللہ علیہ وآلہ وسلم) سے اس کا تذکرہ کیا تو آپ نے فرمایا اسے خرید لو ان کی شرط تمہیں نقصان نہ دے گی اس لیے کہ ولاء تو آزاد کرنے والے کو ملتا ہے۔ جب حضرت بریرہ (رض) کے گھر والوں نے انھیں اس شرط پر فروخت کا ارادہ ظاہر کیا کہ ولاء ان کو ملے اور ان کو آزاد کیا جائے تو جناب رسول اللہ (صلی اللہ علیہ وآلہ وسلم) نے حضرت عائشہ (رض) سے فرمایا تمہارے لیے یہ بات مضر نہیں ہے۔ بلاشبہ ولاء تو آزاد کرنے والے کا ہوتا ہے تو یہ اس بات کی دلالت ہے کہ بیع میں اس قسم کی شروط (جو خلاف عقد ہوں) وہ باطل ہوتی ہیں گویا یہ روایات فریق اوّل کے خلاف تب دلیل بن سکتی ہے جبکہ یہ آثار اسی طرح مروی ہوں کہ حضرت عائشہ (رض) نے خرید کر بریرہ (رض) کو آزاد کرنا چاہا اس کے مالکوں نے اس شرط پر فروخت کرنے پر رضامندی ظاہر کی کہ ولاء ان کو ملے۔ دوسرے فریق کا مؤقف یہ ہے کہ یہ شرط سرے سے باطل ہے انھوں نے اس روایت کو مندرجہ ذیل طرق سے روایت کیا ہے۔