٥٥٢٥: عروہ بن زبیر کہتے ہیں کہ حضرت امّ المؤمنین عائشہ (رض) نے بیان کیا کہ میرے پاس بریرہ آئیں اور کہنے لگیں۔ اے عائشہ (رض) ! میں نے ٩ اوقیہ چاندی پر اپنے مالکوں سے مکاتبت کی ہے اور ہر سال ایک اوقیہ دینے کا وعدہ کیا ہے تم میری بدل کتابت میں معاونت کرو۔ اس وقت تک بدل کتابت میں سے کچھ بھی ادائیگی نہ کی تھی حضرت عائشہ (رض) نے بریرہ کو کہا اپنے مالکوں کو کہو اگر ان کو پسند ہو تو تمام بدل کتابت دے دوں اور تیری ولاء میرے لیے ہوگی۔ وہ اپنے مالکوں کے پاس گئیں اور یہ بات پیس کی تو انھوں نے کہا اگر وہ چاہتی ہیں کہ تم پر صدقہ کردیں تو کر ڈالیں مگر تمہاری ولاء تو ہماری ہی ہوگی پھر حضرت عائشہ (رض) نے اسی سلسلہ میں آپ سے مشورہ کیا تو آپ نے فرمایا یہ چیز تمہارے لیے رکاوٹ نہیں بن سکے گی تو خرید کر آزاد کر دو ۔ ولاء تو آزاد کرنے والے کا ہوتا ہے۔ امام طحاوی (رح) فرماتے ہیں کہ اس روایت کا مضمون پہلی روایات کے خلاف ہے حضرت بریرہ کے مالکوں نے ان کو اس شرط پر فروخت کرنا چاہا کہ عائشہ (رض) اس کو آزاد کرے اور ولاء بھی ان کو ملے تو جناب نبی اکرم (صلی اللہ علیہ وآلہ وسلم) نے فرمایا یہ شرط تمہارے لیے رکاوٹ نہ بننی چاہیے تم خرید کر آزاد کر دو ۔ ولاء تو آزاد کرنے والے کا ہوتا ہے۔ یہ روایت بیع کی اباحت کو اس شرط کے ساتھ ثابت کر رہی ہے کہ مشتری اس کو آزاد کر دے اور معتق کا ولاء بھی بائع کو ملے جب یہ بات اس طرح ہوجائے تو بیع ثابت ہوجائے گی اور شرط باطل ہوجائے گی اور ولاء معتق کو ملے گی اور روایت عروہ عن عائشہ (رض) میں ہے کہ حضرت عائشہ (رض) نے بریرہ (رض) کو فرمایا اگر تمہارے مالک پسند کریں تو میں ان کو تمام بدل کتابت ایک مرتبہ دے دوں گی مگر ولاء میرے لیے ہوگی جب یہ بات بریرہ (رض) اپنے مالکوں کو پیش کی تو انھوں نے کہا اگر وہ ثواب کمانا چاہتی ہیں تو کر ڈالیں مگر ولاء ہماری ہوگی جناب رسول اللہ (صلی اللہ علیہ وآلہ وسلم) نے فرمایا۔ اے عائشہ (رض) یہ شرط تمہیں اس کی خریداری اور آزادی سے مانع نہ ہوجائے ولاء معتق کا ہوتا ہے۔ پس اس روایت میں یہ ہے کہ بریرہ (رض) نے مالکوں کی طرف سے ولاء کی شرط بیع میں تو نہیں تھی لیکن حضرت عائشہ (رض) کی طرف سے کتابت کی ادائیگی میں شرط تھی وہ عقد کتابت کے ذمہ دار تھے اور اس اداء سے پہلے حضرت عائشہ (رض) کو ملک حاصل نہ تھی۔ حضرت عائشہ (رض) نے یہ بات جناب نبی اکرم (صلی اللہ علیہ وآلہ وسلم) کے سامنے ذکر کی تو آپ نے فرمایا ان کی شرط تمہیں اس عمل سے مانع نہ بننی چاہیے تم جو عتاق سے ثواب کی نیت کرچکی ہو اس کو پورا کرو ولاء کو معتق کو ہی ملتا ہے اور یہ شراء کا تذکرہ تو جناب رسول اللہ (صلی اللہ علیہ وآلہ وسلم) نے بطور ابتداء فرمایا اس سے پہلے حضرت عائشہ (رض) اور بریرہ کے مالکوں میں تو اس کا نشان بھی نہیں ہے۔ پھر آپ (صلی اللہ علیہ وآلہ وسلم) کا خطبہ دینا مذکور ہے کہ ان لوگوں کو کیا ہوگیا جو ایسی شرائط مقرر کرتے ہیں جو کتاب اللہ میں نہیں۔ ہر وہ شرط جو کتاب میں نہیں وہ باطل ہے خواہ ایسی سو شرائط ہوں۔ اس میں آپ (صلی اللہ علیہ وآلہ وسلم) نے حضرت عائشہ (رض) کے طلب ولاء والے مطالبے سے انکار فرمایا جو حق ملک کی وجہ سے مکاتبہ کے مالک تھے پھر ان کو بتلایا کہ ولاء تو خود معتق ہی کو ملتا ہے یعنی بدل کتابت کی ادائیگی سے جب مکاتب آزاد کرا دیا جائے تو اب اس کا مکاتب وہ معتق ہے اس لیے ولاء اس کی طرف جائے گی۔ یہ روایت پہلی روایت کے خلاف ہے اور اس میں بیع کے اندر ولاء کی شرط لگانے کا بالکل ذکر نہیں کہ اس سے بیع فاسد ہوجائے گی یا نہیں۔ اگر کوئی معترض کہے کہ ہشام بن عروہ نے اس رایت کو نقل کیا تو اس میں کچھ اضافہ کردیا۔ ہم کہیں گے تم نے سچ کہا۔
خطبہ نبوت : جناب رسول اللہ (صلی اللہ علیہ وآلہ وسلم) نے لوگوں کو خطبہ دیا اور اللہ تعالیٰ کی حمدوثناء کے بعد فرمایا کہ لوگوں کو کیا ہوگیا کہ وہ ایسی شرائط لگاتے ہیں جو کتاب اللہ میں نہیں۔ ہر ایسی شرط جو کتاب اللہ میں نہیں وہ باطل ہے خواہ سو شرائط ہوں اللہ تعالیٰ کا فیصلہ برحق ہے اللہ تعالیٰ کی شرط مضبوط ہے۔ ولاء آزاد کرنے والے کو ملتا ہے۔
امام طحاوی (رح) کا ارشاد : اس روایت کا مضمون پہلی روایات کے خلاف ہے حضرت بریرہ کے مالکوں نے ان کو اس شرط پر فروخت کرنا چاہا کہ عائشہ (رض) اس کو آزاد کرے اور ولاء بھی ان کو ملے تو جناب نبی اکرم (صلی اللہ علیہ وآلہ وسلم) نے فرمایا یہ شرط تمہارے لیے رکاوٹ نہ بننی چاہیے تم خرید کر آزاد کر دو ۔ ولاء تو آزاد کرنے والے کا ہوتا ہے۔
سوال :: ہشام بن عروہ نے اس رایت کو نقل کیا تو اس میں کچھ اضافہ کردیا
جواب : تم نے بالکل درست کہا چنانچہ ان کی روایت یہ ہے۔