٥٩٣٧: ابوالعلاء نے عیاض بن حمار (رض) سے روایت کی ہے کہ جناب نبی اکرم (صلی اللہ علیہ وآلہ وسلم) سے گمشدہ چیز کے متعلق دریافت کیا گیا تو آپ نے فرمایا اس کو مشہور کرو اگر اس کا مالک مل جائے تو مناسب ہے ورنہ یہ اللہ تعالیٰ کا مال ہے۔ یہ حدیث ثابت کر رہی ہے کہ اس کی مشہوری ضروری ہے اور تشہیر کرنے والا دوران تشہیر اپنے پاس رکھے اور مالک کے لیے اس چیز کو محفوظ کرے اس کو چھوڑنے کا حکم نہیں فرمایا گیا۔ اس سے یہ ثبوت مل گیا کہ اس پکڑنے سے روکا گیا ہے جس کو پکڑنے والا اس چیز کے مالک کے لیے نہ پکڑے بلکہ اپنے لیے پکڑے اور جناب رسول اللہ (صلی اللہ علیہ وآلہ وسلم) سے گمشدہ کا یہی حکم منقول ہے اور جناب رسول اللہ (صلی اللہ علیہ وآلہ وسلم) نے لقطہ پر گواہ قائم کرنے اور اس کو ظاہر کرنے اور کتمان نہ کرنے کا حکم فرمایا۔ جیسا ان روایات میں ہے۔