٥٩٥: ابن ابی ذئب نافع (رح) سے نقل کرتے ہیں کہ ابن عمر (رض) جب وضو کرتے اور ان کے نعل قدموں میں ہی ہوتے تو جتنا قدم کا حصہ ظاہر ہوتا اس پر مسح کرلیتے اور کہتے جناب رسول اللہ (صلی اللہ علیہ وآلہ وسلم) اس کو کرتے تھے اس سے یہ معلوم ہوا کہ بقول ابن عمر (رض) آپ کسی وقت قدمین پر مسح کرتے نعلین پر مسح نہ کرتے تھے۔ تو حضرت ابن عمر (رض) نے اطلاع دی کہ جناب رسول اللہ (صلی اللہ علیہ وآلہ وسلم) کسی وقت آپ (صلی اللہ علیہ وآلہ وسلم) اپنے قدمین شریفین پر مسح کرتے ہوئے جوتوں پر مسح فرما لیتے۔ اس میں اس بات کا بھی احتمال موجود ہے کہ آپ (صلی اللہ علیہ وآلہ وسلم) نے قدمین پر مسح تو بقدر فرض کیا اور جوتوں پر جو مسح کیا وہ زائد تھا۔ پس ابو اوس (رض) والی روایت ہمارے ہاں وہی احتمال رکھی ہے جو حضرت مغیرہ بن شعبہ (رض) و ابو موسیٰ (رض) کی روایت میں مذکور ہوا یا پھر جیسا کہ ابن عمر (رض) کی روایت میں جو مذکور ہے پس اگر ابو موسیٰ اور مغیرہ (رض) والی روایت والا مفہوم لیا جائے تو ہم اس طرح عرض کریں گے کہ ہمارے ہاں بھی ان جرابوں پر مسح کرنے میں کچھ حرج نہیں جبکہ وہ گاڑھی موٹی ہوں اور یہ ابو یوسف و محمد (رح) کا قول ہے۔ باقی امام ابوحنیفہ (رح) اس کو اس وقت تک جائز قرار نہیں دیتے جب تک کہ وہ دونوں موٹی اور چمڑے کے تلے والی نہ ہوں۔ اس صورت میں وہ موزوں کی مانند ہوں گے۔ اور اگر ابن عمر والی روایت کا مفہوم لیا جائے تو اس میں قدمین پر مسح کا اثبات ہے۔ باب فرض القدمین میں ہم اس کے معارض اور ناسخ کو ذکر کر آئے۔ پس اس روایت اوس بن ابی اوس کو ابو موسیٰ اور مغیرہ (رض) والی روایت کے معنی میں لیں یا روایت ابن عمر (رض) کے معنی میں لیں کسی صورت میں جوتوں پر مسح کا جواز ثابت نہیں ہوسکتا۔ پس جب اوس (رض) والی روایت محتمل ثابت ہوگئی اور جوتوں پر مسح کے جواز کی کوئی صورت نہ مل سکی تو اب اس کو بطور غور و فکر دیکھا تاکہ اس کا حکم ظاہر ہوجائے پس غور کرنے سے معلوم ہوا کہ وہ موزے جن پر مسح کے جواز کو ثابت کیا گیا جب وہ اس قدر پھٹ جائیں کہ دونوں اقدام یا ان کا اکثر حصہ ظاہر ہوجائے تو سب کا اس پر اتفاق ہے کہ ان پر مسح نہ کیا جائے گا جب مسح موزہ میں یہ شرط ہے کہ ان پر مسح اس وقت جائز ہے جب اس میں پاؤں چھپ جائے اور جب دونوں پاؤں ظاہر ہوجائیں خواہ پھٹنے یا نکالنے کی وجہ سے تو ان پر مسح جائز نہ رہا۔ تو جوتے میں تو دونوں قدم کا اکثر حصہ غائب نہیں ہوتا پس اس سے خود یہ ثابت ہوگیا کہ یہ ان موزوں کی طرح ہیں جن میں پاؤں نہیں چھپتا (پس بالاتفاق ان پر مسح جائز نہ ہوا) ۔
تخریج : ابن حجر فی الدرایہ ١؍٨٣۔
ایک جواب :
ممکن ہے کہ قدمین پر مسح فرض ہو جیسا کہ روایات سے معلوم ہوتا ہے کہ پہلے مسح درست تھا تاآنکہ آپ نے ویل للاعقاب من النار کی وعید فرمائی اور یہ منسوخ ہوگیا اور نعلین پر مسح تو زائد چیز تھی۔
حدیث ابو اوس کا جواب :
نمبر ١: اس میں جس مسح کا تذکرہ ہے اس کی کیفیت وہی ہے جو روایت ابو موسیٰ اور مغیرہ (رض) میں مذکور ہے اگر یہی تاویل مان لی جائے تو ہمیں بھی قطعاً انکار نہ ہوگا مسح جو ربین ثخنین پر صاحبین کے ہاں مسح درست ہے جراب منعل میں تو کسی کو اختلاف نہیں ہے۔
امام ابوحنیفہ (رح) صرف جو ربین منعلین پر مسح کے قائل ہیں۔
نمبر ٢: ابن عمر (رض) والی صورت روایت اوس میں مانی جائے تو اس سے مسح قدمین کا اثبات ہوگا جو کہ پہلے تھا پھر منسوخ ہوگیا جیسا ہم گزشتہ فریضہ قدمین میں ثابت کرچکے۔
بہرحال دونوں میں سے کسی پر محمول کریں مسح نعلین کا مستقلاً ثبوت کسی طور پر بھی نہیں۔ یہ روایت کے لحاظ سے جواب دیا گیا۔
نظر طحاوی (رح) :
ہم غور کرتے ہیں کہ خفین پر مسح کا جواب پختہ روایات سے ثابت ہے اور موزے کے لیے شرط یہ ہے کہ پھٹا ہوا نہ ہو کہ جس سے قدمین کا اکثر حصہ اور پورا قدم ظاہر ہو اور اگر زیادہ پھٹا ہوا ہو تو موزے پر مسح جائز نہیں بلکہ اس کے بقا کے لیے موزے کا پاؤں پر باقی رہنا ضروری ہے ورنہ موزہ اترنے سے مسح جاتا رہے گا تو نعل کی صورت میں تو پاؤں کا اکثر حصہ باہر ہے تو ان پر مسح کیونکر درست ہوسکتا ہے کیونکہ اس صورت میں یہ ان موزوں کے مشابہ ہیں جن میں قدم غائب نہیں ہوتا اور ان پر کسی کے ہاں بھی مسح درست نہیں۔