٥٩٨: عروہ وعمرہ کہتے ہیں کہ حضرت عائشہ (رض) نے روایت کی کہ ام حبیبہ بنت جحش (رض) کو استحاضہ پیش آیا تو اس نے جناب رسول اللہ (صلی اللہ علیہ وآلہ وسلم) سے دریافت کیا آپ نے فرمایا یہ حیض نہیں بلکہ یہ رگ کا خون ہے جس کو ابلیس نے چیر دیا ہے جب ایام حیض گزر جائیں تو غسل کرو اور نماز ادا کرو اور پھر ایام حیض آجائیں تو نماز کو ترک کر دو ۔ حضرت عائشہ (رض) کہتی ہیں کہ وہ ہر نماز کے لیے غسل کرتی تھیں اور کبھی کبھی ٹب میں غسل کرتیں اور اپنی بہن زینب کے حجرہ میں غسل کرتیں بعض اوقات خون کی سرخی پانی پر بلند بھی ہوجاتی جناب رسول اللہ (صلی اللہ علیہ وآلہ وسلم) کو علم بھی ہوتا مگر آپ اس کو نماز سے نہ روکتے (گویا یہ آپ کا نہ روکنا خود جواز کا ثبوت ہوا)
تخریج : بخاری فی الحیض باب ١٩ ٢٨٨‘ مسلم فی الحیض ٦٢‘ ابو داؤد فی الطھارۃ باب ١٠٨‘ نمبر ٢٨٢‘ باب ١٠٩‘ نمبر ٢٨٥‘ ترمذی فی الطھارۃ باب ٩٣‘ نمبر ١٢٩‘ نسائی فی الطھارۃ باب ١٣٤‘ ابن ماجہ فی الطھارۃ باب ١١٥‘ ١١٦‘ مالک فی الطھارۃ نمبر ١٠٤‘ مسند احمد ٦؍٨٣‘ ١٢٩‘۔