٥٩٨٠: عبدالملک بن عمیر کہتے ہیں کہ حضرت جابر بن سمرہ (رض) سے مروی ہے کہ مقام جابیہ میں حضرت عمر (رض) نے ہمیں خطبہ دیا آپ نے ذکر کیا کہ جناب رسول اللہ (صلی اللہ علیہ وآلہ وسلم) ہمارے درمیان کھڑے ہوئے جس طرح آج میں تمہارے درمیان کھڑا ہوں اور آپ نے ارشاد فرمایا میرے صحابہ کرام سے حسن سلوک کرو پھر ان لوگوں سے جو ان کے قریب ہیں (تابعین) پھر جو ان سے قریب ہیں (تبع تابعین) پھر جھوٹ پھیل جائے گا۔ یہاں تک کہ آدمی گواہی دے گا حالانکہ اس سے گواہی طلب نہیں کی جائے گی اور قسم بھی طلب کے بغیر کھائے گا۔
تخریج : ترمذی فی الفتن باب ٧‘ والشہادات باب ٤‘ ابن ماجہ فی الاحکام باب ٢٧‘ مسند احمد ١؍١٨۔
اگر کسی شخص کے پاس کسی معاملے کی گواہی موجود ہو تو وہ مطالبہ کے بعد دے یا پہلے دے اس سلسلہ میں دو فریق ہیں۔
نمبر 1: جو شخص مطالبہ سے پہلے گواہی دے وہ قابل مذمت ہے۔
نمبر 2: مطالبہ سے قبل گواہی دینے والا قابل مدح و ستائش ہی نہیں بلکہ ماجور ہے۔