٦٠٠٩: ابن شہاب بیان کرتے ہیں کہ سہل بن سعد ساعدی (رض) نے بتلایا کہ عویمر عجلانی عاصم بن عدی انصاری (رض) کے پاس آیا اور اسے کہا میرے لیے یہ مسئلہ جناب رسول اللہ (صلی اللہ علیہ وآلہ وسلم) سے دریافت کر دو کہ اگر ایک آدمی اپنی بیوی کے ساتھ کسی غیر مرد کو پائے تو کیا وہ اسے قتل کر دے۔ (اگر وہ ایسا کرلے) تو پھر تم اسے قتل کرو گے یا وہ کیا کرے ؟ جب عاصم (رض) اپنے گھر والوں کی طرف لوٹے تو عویمر آئے اور کہا اے عاصم ! جناب رسول اللہ (صلی اللہ علیہ وآلہ وسلم) نے کیا فرمایا۔ حضرت عاصم کہنے لگے۔ اے عویمر تو میرے پاس اچھی بات نہیں لایا۔ جناب رسول اللہ (صلی اللہ علیہ وآلہ وسلم) نے اس بات کو ناپسند کیا جو کہ میں نے آپ سے دریافت کی۔ عویمر کہنے لگے میں خود جناب رسول اللہ (صلی اللہ علیہ وآلہ وسلم) سے یہ مسئلہ دریافت کروں گا پھر حضرت عویمر خود دربار نبوت میں حاضر ہوئے اس وقت جناب رسول اللہ (صلی اللہ علیہ وآلہ وسلم) صحابہ کرام کے درمیان تشریف فرما تھے۔ عویمر نے عرض کیا یارسول اللہ (صلی اللہ علیہ وآلہ وسلم) ! فرمایئے ! اگر کوئی شخص اپنی بیوی کے ساتھ کسی کو پائے تو وہ کیا کرے اسے قتل کر دے (پھر آپ اس کے قاتل کو قتل کردیں گے یا وہ کیا کرے ؟ جناب رسول اللہ (صلی اللہ علیہ وآلہ وسلم) نے فرمایا اللہ تعالیٰ نے تمہارے اور تمہاری بیوی کے متعلق حکم نازل فرمایا ہے۔ جاؤ اور اسے لے آؤ! حضرت سہل فرماتے ہیں کہ پھر ان دونوں نے لعان کیا۔ میں بھی اس وقت صحابہ کرام کے ساتھ خدمت اقدس میں حاضر تھا جب وہ دونوں فارغ ہوئے تو حضرت عویمر (رض) نے کہا یارسول اللہ (صلی اللہ علیہ وآلہ وسلم) ! اگر میں اس کو اپنے پاس رکھوں تو گویا میں نے اس پر جھوٹ باندھا ہے چنانچہ انھوں نے جناب رسول اللہ (صلی اللہ علیہ وآلہ وسلم) کے فیصلے سے پہلے ہی تین طلاقیں دے دیں۔
ابن شہاب (رح) کہتے ہیں کہ لعان کرنے والے کے متعلق یہی طریقہ ہے۔
تخریج : بخاری فی الطلاق باب ٤‘ والحدود ٤٣‘ مسلم فی اللعان ١‘ ابو داؤد فی الطلاق باب ٢٧‘ نسائی فی الطالق باب ٧‘ دارمی فی النکاح باب ٣٩‘ مالک فی الطلاق ٣٤‘ مسند احمد ٥؍٣٣١۔