٦٥٢: سفیان نے اپنی سند سے اسی طرح روایت نقل کی ہے۔ حضرت عمار (رض) کی یہ روایت مضطرب ہے البتہ سب راویوں نے کندھوں اور بغلوں تک مسح کی نفی کی ہے۔ اس سے ثابت ہوگیا کہ ان سے عبیداللہ یا ابن عباس (رض) والی روایت منتفی ہے اور آخری دو اقوال میں سے ایک قول ثابت ہوگیا۔ اب ہم نے غور کیا تو حضرت ابوجہیم (رض) کی روایت جناب رسول اللہ (صلی اللہ علیہ وآلہ وسلم) سے مل گئی کہ آپ نے اپنے چہرے اور بازوؤں پر مسح کیا۔ پس یہ کھلی دلیل بن گئی کہ تیمم کفین تک ہے اور نافع نے حضرت ابن عباس (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے کہنیوں سمیت تیمم فرمایا۔ میں نے ان دونوں روایات کو باب قراء ۃ القرآن للحائض میں ذکر کردیا ہے۔
روایت حضرت عمار (رض) پر جرح :
روایت عمار (رض) میں اضطرابات ہیں جن کی تفصیل عرض کرنے سے پہلے ان روایات کا حاصل عرض کرتے ہیں۔
حاصل روایات :
ان تمام روایات میں کندھے اور بغل کی نفی مکمل طور پر ثابت ہے اس سے حضرت عمار (رض) کی پہلی روایت کا نسخ تو ظاہر ہوگیا اسی طرح اس سے عبیداللہ بن مسعود اور ابن عباس (رض) کی روایت کی نفی بھی ہوگئی اب دو آخری باتوں میں سے ایک کے ثبوت کو دیکھا جائے گا۔
اضطرابات :
ہمارے استاذ محمد بن خزیمہ نے اپنی سند میں اس طرح نقل کیا عبدالرحمن بن ابزٰی عن ابیہ حالانکہ وہ (ابزٰی مراد ہے) ذر عن ابن عبدالرحمن عن ابیہ ہے۔
روایت نمبر ١: سعید بن عبدالرحمن بن ابزیٰ عن ابیہ یہاں ابیہ سے مراد عبدالرحمن ہے۔
روایت نمبر ٢: ذر کی روایت اسی طرح ہے۔
نمبر ٣: میں ابو مالک نے عمار سے براہ راست نقل کی ہے۔
نمبر ٤: میں سلمہ نے سعید بن عبدالرحمن اور عبدالرحمن نے عمار سے نقل کی۔
نمبر ٥: میں ذر نے عبدالرحمن بن ابزٰی عن ابیہ عبدالرحمن اپنے والد ابزیٰ کے واسطہ سے عمار سے نقل کی۔
نمبر ٦: میں ذر نے ابن عبدالرحمن بن ابزی یعنی عبدالرحمن نے عمار سے نقل کی۔
نمبر ٧: سلمہ نے ابو مالک عن عبدالرحمن بن ابزی اور ابزی نے عمار سے نقل کی ہے۔
نمبر ٨: اس میں بھی اسی طرح ہے۔
ایک نگاہ توجہ :
ابو جہم (رض) کی روایت میں چہرے اور یدین کا تذکرہ ہے کفین کا لفظ نہیں اور گٹوں تک ہے اس روایت سے گٹوں تک کے قائلین نے استدلال کیا ہے اور دوسری روایت ابن عباس (رض) ہے جس میں مرفقین تک تیمم کا ثبوت ہے یہ دونوں روایتیں قراۃ القرآن للحائض میں ذکر ہو چکیں دوسری روایت مرفقین کے قائلین کی دلیل ہے اس کی تائید کے لیے حضرت اسلع تمیمی کی روایت ذکر کی جا رہی ہے۔