٧١٥٦: عبداللہ بن یحییٰ انصاری نے اپنے والد سے اپنے دادا سے روایت کی ہے کہ میری دادی جناب رسول اللہ (صلی اللہ علیہ وآلہ وسلم) کی خدمت میں حاضر ہوئی اور اس کے پاس چاندی تھی وہ کہنے لگی میں اس کو صدقہ کرنا چاہتی ہوں جناب رسول اللہ (صلی اللہ علیہ وآلہ وسلم) نے فرمایا عورت کو اپنے مال میں کوئی اختیار نہیں جب تک اس کا خاوند اجازت نہ دے کیا تم نے اپنے خاوند سے اجازت لی ہے تو اس نے جواب دیا۔ جی ہاں۔ پھر جناب رسول اللہ (صلی اللہ علیہ وآلہ وسلم) نے ایک شخص کو بھیجا جو معلومات کر کے آئے کہ کیا تم نے اپنی عورت کو اجازت دی ہے کہ وہ اپنے یہ زیورات صدقہ کرے۔ تو اس نے جواب دیا جی ہاں۔ تو جناب رسول اللہ (صلی اللہ علیہ وآلہ وسلم) نے اس سے قبول فرمالیا۔ امام طحاوی (رح) کہتے ہیں : بعض لوگ اس روایت کی طرف گئے ہیں ان کا یہ کہنا ہے کہ عورت اپنے مال میں سے کسی چیز کو صدقہ یا ہبہ خاوند کی اجازت کے بغیر نہیں کرسکتی۔ فریق ثانی کا مؤقف ہے کہ عورت کو اپنے تمام مال میں تصرف کی اجازت ہے وہ اپنے مال میں اسی طرح مختار ہے جس طرح خاوند اپنے مال میں پورا اختیار رکھتا ہے انھوں نے اس آیت کو دلیل بنایا ہے ” واتوالنساء صدقاتہن نحلۃ فان طبن لکم عن شیٔ منہ نفسا فکلوہ ہنیئا مریئا “ (النساء ٤) اس آیت میں خاوند کے لیے اس مال کو عورت کے مال مہر میں سے مباح قرار دیا گیا جو وہ خوشدلی سے خاوند کو دے دے (اگر وہ مال کی مختار نہ ہوتی تو ضمیر کی نسبت اس کی طرف نہ ہوتی) اور اللہ تعالیٰ نے فرمایا ” وان طلقتموہن “ (البقرہ ٢٣٧) اس آیت میں اللہ تعالیٰ نے اپنے مال کے معاف و درگزر کرنے کی اجازت دی ہے جبکہ اس کا خاوند بلامساس کے اس کو طلاق دے دے اور اس کا مہر مقرر ہو۔ حاصل دلیل یہ ہے کہ اس سے دلالت مل گئی کہ عورت کا حکم اس کے اپنے مال میں چلتا ہے اور وہ اپنے مال میں تصرف کا خاوند کی طرح برابر اختیار رکھتی ہے اور اس معنی کی موافقت میں روایات وارد ہیں۔ ایک روایت تو وہ ہے جو کتاب الزکوۃ میں گزری کہ حضرت ابن مسعود (رض) کی بیوی اپنا زیور لیے جناب رسول اللہ (صلی اللہ علیہ وآلہ وسلم) کی خدمت میں جانے لگی تاکہ اس کو صدقہ کرے۔ تو عبداللہ کہنے لگے۔ لاؤ یہ مجھ پر صدقہ کر دو ۔ تو انھوں نے کہا نہیں جب تک کہ جناب رسول اللہ (صلی اللہ علیہ وآلہ وسلم) سے دریافت نہ کرلوں۔ تو اس نے جناب رسول اللہ (صلی اللہ علیہ وآلہ وسلم) سے اس سلسلہ میں اجازت طلب کی تو آپ نے فرمایا ان پر خرچ کرو اور ان یتیموں پر جو تمہاری پرورش میں ہیں وہ اس صدقہ کے خرچ کا مقام ہیں۔ تو جناب رسول اللہ (صلی اللہ علیہ وآلہ وسلم) نے اس کے لیے زیور کے صدقہ کو خاوند کے حق میں مباح کردیا اور اسی طرح یتامیٰ پر۔ اور اس میں ان کے خاوند کی اجازت کا حکم نہیں فرمایا۔ ! اس روایت میں یہ بات بھی موجود ہے کہ آپ (صلی اللہ علیہ وآلہ وسلم) نے عورتوں کو وعظ فرمایا اور اس میں فرمایا تم صدقہ کرو۔ اس روایت میں خاوندوں کی اجازت کا کہیں تذکرہ موجود نہیں۔ اس سے یہ بات ثابت ہوگئی کہ عورتیں اپنے اموال میں اپنے خاوندوں کے حکم کے بغیر جو چاہیں صدقہ کرسکتی ہیں۔
خلاصہ الزام :
عورت اپنے مال میں سے کوئی چیز ہبہ یا صدقہ خاوند کی اجازت کے بغیر نہیں کرسکتی۔
فریق ثانی کا قول یہ ہے کہ عورت کو اپنے مال میں مکمل تصرف کا حق حاصل ہے اس قول کو ائمہ احناف رحمہم اللہ نے اختیار کیا ہے۔