٧٢١٣: ابراہیم بن صالح بن عبداللہ یہ صالح بن عبداللہ وہی ہیں جو نعیم بن نحام کے نام سے مشہور ہیں لیکن جناب رسول اللہ (صلی اللہ علیہ وآلہ وسلم) نے ان کا نام صالح رکھا وہ بیان کرتے ہیں کہ عبداللہ ابن عمر (رض) نے حضرت عمر (رض) کو کہا کہ میرے لیے صالح کی بیٹی کے نکاح کا پیغام دیں تو حضرت عمر (رض) نے فرمایا ان کے پاس یتیم بھتیجے ہیں وہ ان پر تجھے ترجیح نہیں دے سکتا عبداللہ اپنے چچا زید بن خطاب کی طرف گئے تاکہ وہ ان کی طرف سے پیغام دیں حضرت زید صالح کی طرف گئے اور کہا کہ عبداللہ نے مجھے تمہاری طرف بھیجا ہے کہ میں ان کے لیے تمہاری بیٹی کے متعلق پیغام دوں تو صالح کہنے لگے میرے پاس یتیم ہیں میں اپنے گوشت کو خاک الود کر کے تمہارے گوشت کو بلند نہیں کرسکتا میں تمہیں گواہ بناتا ہوں کہ میں نے اس لڑکے کا نکاح فلاں سے کردیا لڑکی کی والدہ کی خواہش یہ تھی کہ وہ ابن عمر (رض) سے نکاح کرے پس وہ رسول اللہ (صلی اللہ علیہ وآلہ وسلم) کی خدمت میں حاضر ہوئی اور کہنے لگی یارسول اللہ (صلی اللہ علیہ وآلہ وسلم) ابن عمر (رض) نے میری بیٹی کے لیے پیغام نکاح دیا تو اس کے والد نے اپنی پرورش میں ایک یتیم سے اس کا نکاح کردیا اور بچی سے مشورہ بھی نہیں کیا تو جناب رسول اللہ (صلی اللہ علیہ وآلہ وسلم) نے صالح کی طرف پیغام بھیجا اور فرمایا تم نے اپنی بیٹی کا نکاح اس کے مشورے کے بغیر کردیا انھوں نے عرض کی جی ہاں تو جناب رسول اللہ (صلی اللہ علیہ وآلہ وسلم) نے فرمایا عورتوں کی ذات معاملے میں ان سے مشورہ کرلیا کرو جبکہ وہ کنواری ہوں حضرت صالح نے کہا یہ میں نے اس لیے کیا کہ جب ابن عمر (رض) نے اس کو مہر دے دیا (تو میں نے اس کا نکاح کردیا) پس اس لڑکی کا میرے مال میں سے اتنا ہی مال ہوگا جتنا انھوں نے اس کو دیا ہے۔ اس روایت کی سند اور متن دونوں مجروح ہیں۔ سند کے لحاظ سے یہ روایت ابراہیم بن صالح پر موقوف ہے جبکہ اس کے بالمقابل پہلی روایت ابراہیم سے تجاوز کر کے والد تک پہنچتی اور ابن عمر (رض) تک پہنچتی ہے تو ہمارے مخالف کے مذہب پر مناسب یہ ہے کہ اس روایت میں جو کچھ حضرت لیث نے روایت کیا ہے اسے عبداللہ بن لہیعہ کی روایت سے اولیٰ قرار دیا جائے۔ کیونکہ لیث ثبت و ضبط کے لحاظ سے اس سے بہت بڑھ کر ہیں اور ان کی روایت میں خلط کم پایا جاتا ہے جبکہ عبداللہ بن لہیعہ کی روایت اس کے برعکس اور الٹ ہے۔ اس روایت کے متن میں ابن لہیعہ کی روایت کے خلاف یہ بات پائی جاتی ہے کہ جب جناب رسول اللہ (صلی اللہ علیہ وآلہ وسلم) کو یہ اطلاع ملی کہ حضرت نعیم نے اپنی بیٹی کا نکاح اس کی مرضی کے خلاف کردیا ہے تو آپ نے ان کو فرمایا کہ عورتوں سے ان کے نفوس کے متعلق مشورہ کرلیا کرو۔ تو یہ بات حضرت نعیم (رض) کے طرز عمل کی تردید ہے کیونکہ انھوں نے اپنی بیٹی کے معاملے میں اس سے مشورہ نہیں کیا تھا تو یہ ابن لہیعہ کی روایت کے متن میں نہیں ہے۔ اس روایت میں یہ بات کہیں موجود نہیں ہے کہ جناب رسول اللہ (صلی اللہ علیہ وآلہ وسلم) نے اس نکاح کو فسخ کردیا۔ ہمارے نزدیک اس روایت کا مطلب یہ ہے واللہ اعلم۔ کہ حضرت نعیم (رض) کی لڑکی نے بارگاہ نبوت میں حاضر ہو کر فسخ نکاح کا مطالبہ نہ کیا تھا بلکہ اس کی والدہ حاضر ہوئی اور وہ بھی اس کی وکالت کے طور پر نہیں کہ جناب رسول اللہ (صلی اللہ علیہ وآلہ وسلم) کو اس توکیل کی وجہ سے اس کے ساتھ کلام لازم ہوجاتا۔ فلہذا آپ (صلی اللہ علیہ وآلہ وسلم) نے حضرت نعیم (رض) کو جو کچھ فرمایا وہ بطور تعلیم تھا اور آپ نے اس سے نکاح کو فسخ نہ کیا تھا کیونکہ فسخ کا تعلق فیصلے سے ہے۔ اور اس بات پر سب کو اتفاق ہے کہ فیصلہ کے لیے فریقین کی موجودگی لازم ہوتی ہے۔ ولید بن مسلم نے ابن ابی ذئب سے انھوں نے نافع سے انھوں نے حضرت ابن عمر (رض) سے روایت کی ہے کہ ایک آدمی نے اپنی کنواری لڑکی کا نکاح اس کی ناپسندیدگی کے باوجود کردیا تو جناب نبی اکرم (صلی اللہ علیہ وآلہ وسلم) نے اس کے نکاح کو رد کردیا۔ تو پھر یہ کیسے ممکن ہے کہ روایت نعیم بن نحام (رض) کو اس پر محمول کریں جس طرح کہ اس کو ابن لہیعہ نے روایت کیا ہے کیونکہ اس نے اس روایت کو ابن عمر (رض) کی طرف لوٹایا ہے جبکہ حضرت ابن عمر (رض) سے اس کے خلاف مروی ہے۔ پھر اس سے آگے بڑھ کر ہم کہتے ہیں کہ حضرت نعیم بن نحام (رض) کی بیٹی کے سلسلہ میں ایسی روایت موجود ہے جو یہ دلالت کرتی ہے کہ وہ کنواری نہیں بلکہ بیوہ تھی۔ روایت ملاحظہ ہو۔
تخریج : مسند احمد ٢؍٩٧‘ ٤؍١٩٢۔