٧٢١٤: عروہ نے ابن عمر (رض) سے روایت کی ہے کہ میں حضرت عمر (رض) کے پاس گیا اور عرض کیا کہ میں نے نعیم بن نحام (رض) کی بیٹی کو پیغام نکاح دیا ہے اور میں یہ چاہتا ہوں کہ آپ میرے ساتھ چل کر ان سے بات کریں تو مجھے عمر (رض) نے کہا میں نعیم کو تم سے بہتر جانتا ہوں اس کے ہاں اس کا بھتیجا یتیم موجود ہے وہ اپنے گوشت کو مٹی میں ڈال کر لوگوں کے گوشت کے لیے فیصلہ نہ کرے گا۔ ابن عمر (رض) کہنے لگے اس کی والدہ نے میری طرف پیغام نکاح بھیجا ہے تو حضرت عمر (رض) کہنے لگے اگر تم نے ضرور کرنا ہے تو پھر اپنے ساتھ اپنے چچا زید کو لے جاؤ۔ راوی کہتے ہیں کہ اس نے وہی بات کی گویا کہ اس نے عمر (رض) کی بات سن رکھی ہے۔ نعیم کہنے لگے تمہارے آنے پر خوش آمدید تم بڑے مرتبے اور شرف والے ہو پھر کہنے لگے۔ میرا ایک یتیم بھتیجا ہے اور میں اپنے گوشت کو مٹی میں ملا کر دوسروں کے گوشت کو معزز کروں تو اس پر گھر کی جانب سے بچی کی والدہ بول اٹھیں یہ ہرگز نہ ہوگا جب تک کہ جناب رسول اللہ (صلی اللہ علیہ وآلہ وسلم) اس کے متعلق فیصلہ نہ فرمائیں گے کیا تم بنی عدی کی ایک بیوہ لڑکی کو اپنے کم عقل بھتیجے کے لیے روک کر رکھتا ہے ؟ انھوں نے سفیہ یا ضعیف کا لفظ بولا۔ راوی کہتے ہیں پھر وہ نکل کر جناب نبی اکرم (صلی اللہ علیہ وآلہ وسلم) کی خدمت میں آئیں اور ان کو ساری بات کی اطلاع دی تو آپ (صلی اللہ علیہ وآلہ وسلم) نے نعیم کو بلایا تو انھوں نے اس طرح تمام واقعہ سنایا جو انھوں نے ابن عمر (رض) کو کہا تھا۔ تو جناب رسول اللہ (صلی اللہ علیہ وآلہ وسلم) نے فرمایا اے نعیم۔ صلہ رحمی کرو۔ بیوہ اور اس کی ماں کو راضی کرو کیونکہ ان کے معاملہ میں ان کا حصہ ہے۔ اس روایت سے معلوم ہوتا ہے کہ نعیم کی بیٹی بیوہ تھی اور یہ بات بہت بعید ہے کہ جناب نبی اکرم (صلی اللہ علیہ وآلہ وسلم) اس کی مرضی کے بغیر اس کے والد کے کئے ہوئے نکاح کو جائز رکھیں۔