٧٢٢٤: ثمامہ بن عبداللہ نے حضرت انس (رض) سے روایت کی ہے کہ حضرت صدیق (رض) نے جب خلافت کی باگ سنبھالی تو حضرت انس (رض) کو بحرین کی طرف روانہ فرما کر یہ خط تحریر فرمایا یہ فرض زکوۃ ہے جس کو جناب رسول اللہ (صلی اللہ علیہ وآلہ وسلم) نے مسلمانوں پر لازم کیا ہے۔ اس کا حکم اللہ تعالیٰ نے اپنے رسول کو دیا ہے۔ جو اس کو مسلمانوں سے اس کے طریقہ کے مطابق مانگے تو وہ اس کو ادا کرے اور جس سے اضافہ کے ساتھ سوال کیا جائے وہ نہ دے۔ اور ان کے خط میں یہ بھی تھا کہ جب اونٹوں کی تعداد ایک سو بیس سے بڑھ جائے تو پھر ہر چالیس میں ایک بنت لبون اور ہر پچاس میں حقہ دیا جائے گا۔