٨٧٥: ابو صالح نے حضرت ابوہریرہ (رض) سے نقل کیا کہ جناب نبی اکرم (صلی اللہ علیہ وآلہ وسلم) نے ارشاد فرمایا نماز کا اول و آخر وقت ہے اور ظہر کا اول وقت وہ ہے جب سورج ڈھل جائے اور اس کا آخری وقت جبکہ عصر کا وقت آجائے۔ پس اس سے ثابت ہوا کہ عصر کا وقت اس وقت داخل ہوتا ہے جب ظہر کا وقت نکل جاتا ہے۔ رہی وہ روایت جس میں عصر کا وقت مذکور ہے اس میں کچھ اختلاف نہیں کہ آپ (صلی اللہ علیہ وآلہ وسلم) نے اسے اس وقت میں ادا فرمایا ہو جس کا ہم نے تذکرہ کردیا۔ پس اس سے یہ ثابت ہوگیا کہ وہ نماز عصر کا اول وقت ہے آپ سے یہ منقول ہے کہ آپ نے اس کی ادائیگی دوسرے روز اس وقت فرمائی جبکہ ہر چیز کا سایہ اس کی دو مثل ہوگیا۔ پھر آپ نے فرمایا اس نماز کا وقت وہی ہے جو ان دونوں اوقات کے درمیان ہے۔ پس اس میں یہ احتمال ہے کہ وہ اس کا ایسا آخری وقت ہو کہ جب وہ نکل جاتا ہے تو وہ نماز فوت ہوجاتی ہے اور یہ بھی احتمال ہے کہ اس سے مراد وہ وقت ہو کہ جس سے نماز کو عمومی حالات میں مؤخر کرنا مناسب نہیں ہے یہاں تک کہ وہ ختم ہو اور وہ شخص جس نے اس کے بعد اس کو ادا کیا اگرچہ وہ اس کو اس کے وقت کی حدود میں ادا کررہا ہے مگر وہ زیادتی کرنے والا ہے کیونکہ اس نے اس نماز کو فضیلت وثواب والے وقت سے ہٹا دیا۔ اگرچہ وہ نماز بالکل فوت تو نہیں ہوئی اور جناب رسول اللہ (صلی اللہ علیہ وآلہ وسلم) سے مروی ہے کہ آپ (صلی اللہ علیہ وآلہ وسلم) نے فرمایا کہ آدمی نماز تو پڑھتا ہے اور ظاہر میں وہ اس سے فوت بھی نہیں ہوتی مگر جب اس نے اس کو (فضیلت والے) وقت سے فوت کردیا ‘ وہ اس کے لیے اس کے اہل و مال سے زیادہ بہتر تھا۔ پس اس ارشاد سے یہ ثابت ہوگیا کہ خاص وقت میں نماز بقیہ تمام وقت کی نماز کے ساتھ احاطہ کرنے سے بہتر ہے اور اس میں یہ بھی احتمال ہے کہ اس سے مراد وہ وقت ہو جس سے نماز کا مؤخر کرنا کسی صورت میں درست نہیں یہاں تک کہ یہ وقت نکل جائے وہ وقت ہے کہ جس میں جناب رسول اللہ (صلی اللہ علیہ وآلہ وسلم) نے دوسرے دن نماز ادا فرمائی اور ہماری اس بات پر مندرجہ روایات دلالت کرتی ہیں۔
تخریج : ترمذی فی باب الصلاۃ باب ١ نمبر ١٥١۔
فریق ثانی :
امام ابوحنیفہ (رح) کے ہاں دو مثل تک ظہر کا وقت ہے اور اس کے بعد عصر کا وقت شروع ہوتا ہے۔
دلیل نمبر ١: حضرت ابن عباس ‘ ابو سعید خدری ‘ ابوہریرہ (رض) کی روایات میں ظہر کی نماز دوسرے دن اس وقت پڑھنا ثابت ہے جب ہر چیز کا سایہ ایک مثل ہوچکا تو اس سے معلوم ہوا کہ مثل اول کے ختم ہونے کے بعد مثل ثانی میں ظہر پڑھی پس ظہر کا وقت مثل ثانی میں بھی باقی تھا ورنہ وقت کے بعد نماز پڑھنا لازم آئے گا اور یہ وقت دو مثل تک بھی پہنچ سکتا ہے روایت نمبر ٨٧٥ سے یہ بات ظاہر ہوتی ہے کہ عصر کے وقت کا دخول ظہر کے وقت کے خروج پر ہے۔
وقت عصر :
اماما ذکر سے اس کو بیان فرمایا کہ عصر کا وقت مثل اول یا مثل ثانی کے بعد علی اختلاف الاقوال جیسا ذکر کر آئے یہ عصر کا اوّل وقت ہے جبکہ ظہر کا وقت دونوں اقوال کے مطابق ختم ہوجائے۔
عصر کا آخری وقت :
فریق نمبر ١: امام شافعی ومالک کے ایک قول کے مطابق عصر کا وقت دو مثل پر ختم ہوجاتا ہے۔
فریق نمبر ٢: احناف و حنابلہ و جمہور فقہاء نیز شافعی ومالک (رح) کے ہاں عصر کا وقت دو مثل کے بعد بھی باقی رہتا ہے۔
فریق اوّل کی دلیل :
پہلے روایات میں گزرا کہ آپ (صلی اللہ علیہ وآلہ وسلم) نے نماز عصر دوسرے دن دو مثل پر یا سورج کے بلندی میں ہوتے ہوئے ادا فرمائی اور یہ فرمایا کہ ان کے مابین وقت عصر ہے اس سے معلوم ہوا کہ دو مثل پر وقت ختم ہوجاتا ہے اور اس کے بعد نماز فوت ہوجاتی ہے ایک احتمال یہ بھی ہے۔
فریق ثانی اور اس کے دلائل :
فاحتمل ان یکون اس سے فریق ثانی کے مؤقف کی طرف اشارہ کرتے ہیں کہ دو مثل کے بعد وقت باقی ہے آپ (صلی اللہ علیہ وآلہ وسلم) نے نماز عصر دو مثل پر پڑھائی اس کا مطلب یہ بھی ہوسکتا ہے کہ آپ کو بتلانا مقصود ہو کہ یہ وہ مناسب وقت ہے جس سے نماز کو مؤخر نہیں کرنا چاہیے اور اس کو نکلنے نہ دے اگرچہ اس کے بعد پڑھنے والا بھی وقت میں پڑھ رہا ہے مگر وہ زیادتی کرنے والا ہے کیونکہ اس نے اس کو ایسے وقت سے مؤخر کیا ہے جو فضیلت والا ہے اگرچہ اس کی نماز فوت تو نہیں ہوئی جیسا کہ اس ارشاد میں فرمایا گیا ہے جناب رسول اللہ (صلی اللہ علیہ وآلہ وسلم) نے فرمایا بلاشبہ آدمی نماز پڑھ لیتا ہے اور نماز اس سے فوت تو نہیں ہوتی البتہ جو وقت اس سے فضیلت والا رہ گیا (اور میسر نہیں آیا) وہ اس کے اہل و مال سے بڑھ کر فضیلت والا تھا (مالک فی الموطا فی الوقوت نمبر ٢٣) اس روایت سے یہ ظاہر ہوتا ہے کہ نماز کے بعض اوقات اس کے دوسرے اوقات سے افضل ہوتے ہیں۔
احتمال نمبر ٢: یحتمل ان یکون سے دوسرا احتمال ذکر کرتے ہیں کہ ممکن ہے وقت سے مراد وہ وقت ہو جس سے عصر کو مؤخر کرنا مناسب نہیں یہاں تک وہ وقت اس سے (کسی مجبوری سے) نکل جائے جس میں جناب رسول اللہ (صلی اللہ علیہ وآلہ وسلم) نے دوسرے دن نماز ادا فرمائی۔
اور یہ روایات اس بات پر دلالت کرتی ہیں۔