٩٤٧: حصن بن عبیداللہ نے انس بن مالک (رض) سے روایت کی کہ جناب رسول اللہ (صلی اللہ علیہ وآلہ وسلم) مغرب و عشاء کو سفر میں جمع فرماتے تھے۔ امام طحاوی (رح) فرماتے ہیں کچھ لوگوں نے یہ راستہ اپنایا کہ ظہر و عصر کا وقت ایک ہے۔ انھوں نے اپنی دلیل بتاتے ہوئے کہا کہ اسی وجہ سے جناب نبی اکرم (صلی اللہ علیہ وآلہ وسلم) نے دونوں کو ایک وقت میں جمع فرمایا اور مغرب و عشاء کا بھی ان کے ہاں یہی حکم ہے کہ ان کا وقت ایک ہی ہے اور ان میں سے کوئی بھی اس وقت تک فوت شدہ شمار نہ ہوگی جب تک دوسری کا وقت نہ گزر جائے۔ علماء کی دوسری جماعت نے ان کی ممانعت میں کہا ہے کہ ان تمام نمازوں کو اپنے اوقات میں دوسری نماز کا وقت اس میں شامل نہیں۔ رہی وہ روایات جن میں تمہیں دو نمازوں کا جمع کرنا معلوم ہو رہا ہے وہ آپ ہی کے ارشادات ہیں جو آپ سے مروی ہیں مگر ان میں آپ کے جمع والے قول کی کوئی دلیل نہیں۔ اس میں کئی احتمال ہیں۔ ایک احتمال وہ بھی ہے جو تم نے ذکر کیا اور دوسرا احتمال یہ ہے کہ ہر ایک اپنے اپنے وقت میں ادا فرمایا جیسا کہ جابر بن زید کا خیال ہے اور اسی نے یہ ابن عباس (رض) سے اور عمرو بن دینار سے ان کے بعد نقل کیا ہے۔ پہلے مقالہ والوں نے دعویٰ کیا کہ ہمیں ایسی روایات ملی ہیں جو ہمارے قول کی تائید کرتی ہیں۔ مندرجہ روایات ملاحظہ ہوں۔
تخریج : بخاری فی تقصیر الصلاۃ باب ١٦‘ مسلم فی صلوۃ المسافرین نمبر ٤٦‘ ابو داؤد فی الصلاۃ باب ٥‘ نمبر ١٢١٨‘ نسائی فی تخریج المواقیت باب ٤٢۔
حاصل روایات : ان سترہ روایات سے ظہر و عصر اور مغرب و عشاء کا ایک وقت میں مدینہ منورہ اور سفر و حضر ہر دو میں ثابت ہوتا ہے وہ کہتے ہیں کہ ایک کا وقت اس وقت تک نہیں نکلتا جب تک دوسری کا وقت نہ نکل جائے۔
فریق دوم کا مؤقف اور مستدل روایات اور جوابات :
امام ابوحنیفہ (رح) اور صاحبین ‘ حسن بصری (رح) جمع کو درست قرار نہیں دیتے تمام نمازوں کے اپنے اوقات ہیں انہی میں ان کو پڑھا جائے گا۔
روایات کا جواب :
ان روایات میں تم نے جمع حقیقی مراد لیا حالانکہ یہاں جمع صوری مراد ہے پس مجموعہ روایات میں تطبیق ہوجائے گی اور جابر بن عبداللہ (رض) نے ابن عباس (رض) سے یہی نقل کیا ہے اور عمرو بن دینار نے بھی نقل کیا۔
ایک اشکال :
مندرجہ ذیل روایات سے معلوم ہوتا ہے کہ جمع حقیقی مراد ہے۔