٩٥٠: اسامہ بن زید نے نافع سے اور انھوں نے ابن عمر (رض) سے روایت کی ہے ابن عمر تیزی سے رواں دواں تھے ذرا سا آرام کیا ظہر یا عصر کے لیے اترے مغرب کو مؤخر کیا یہاں تک کہ سالم نے ” الصلاۃ “ کی آواز دی ابن عمر (رض) خاموش رہے یہاں تک کہ شفق کے غائب ہونے کا وقت ہوا تو اترے اور مغرب و عشاء کو جمع کیا اور فرمایا میں نے جناب رسول اللہ (صلی اللہ علیہ وآلہ وسلم) کو اسی طرح کرتے ہوئے دیکھا جبکہ آپ کو جلد جانا ہوتا تھا۔ اس روایت میں بتلا دیا گیا کہ آپ (صلی اللہ علیہ وآلہ وسلم) کا مغرب کے لیے اترنا شفق کے غائب ہونے سے پہلے تھا۔ پس اس میں اس بات کا احتمال ہے کہ نافع کا قول : ” بعد ما غاب الشفق “ جو کہ ایوب کی روایت میں آیا ہے اس سے مراد شفق کے غائب ہونے کا قریبی وقت ہو ‘ تاکہ ان کی دوسری روایت سے اس روایت کا تضاد نہ ہو۔ اس روایت کو اسامہ بن زید کے علاوہ حضرات نے بھی نافع سے نقل کیا ہے جیسا کہ اسامہ بن زید (رض) نے نقل کی ہے۔
تخریج : نسائی ١؍٩٩۔
اب اس روایت نے وضاحت کردی کہ آپ کا مغرب کے لیے اترنا عند غیبوبۃ الشفق تھا پس روایت ایوب میں جو اس کے خلاف مذکور ہے اس سے صاف مراد غیبوبۃ شفق کے قریب اترنا ہے تاکہ اس سے دوسری روایت متضاد نہ ہو۔
نمبر ٣: نافع سے اسامہ بن زید کے علاوہ دیگر روات نے بھی یہ بات نقل فرمائی ہے چنانچہ ملاحظہ ہو ابن جابر سے نافع کی روایت ۔