٩٤٩: یحییٰ بن عبداللہ نے نافع اور انھوں نے ابن عمر (رض) سے روایت نقل کی ہے جب ان کو جلدی مطلوب ہوتی تو مغرب و عشاء کو جمع فرماتے اس کے بعد کہ شفق غائب ہوجاتی اور فرماتے جناب رسول اللہ (صلی اللہ علیہ وآلہ وسلم) کو جب سفر میں جلدی ہوتی تو ان دو نمازوں کو جمع کرتے۔ ان کا کہنا یہ ہے کہ یہ روایت آپ کی دو نمازوں کے جمع کی کیفیت بتلا رہی ہیں۔ ان کے مخالفین کے پاس ان کے خلاف دلیل یہ ہے کہ روایت ایوب جس میں یہ کہا گیا ہے کہ وہ چلتے گئے یہاں تک کہ شفق غائب ہوگیا پھر نافع کے تمام احباب اتر گئے۔ عبیداللہ ‘ مالک ‘ لیث اور نہ ہی کسی اور راوی جنہوں نے روایت ابن عمر (رض) سے نقل کی ‘ کسی سے یہ بات بیان نہیں کی یہ صرف فعل ابن عمر (رض) کی اطلاع دی ہے اور جناب رسول اللہ (صلی اللہ علیہ وآلہ وسلم) کا دو نمازوں کو جمع کرنا نقل کیا مگر یہ بیان نہیں کیا کہ کس طرح جمع کیا اور روایت عبیداللہ میں اس طرح ہے کہ ” جمع بینہما “ کہ دونوں کو جمع کیا پھر انھوں نے ابن عمر (رض) کے فعل جمع کو ذکر کردیا کہ اس کی کیفیت کیا تھی اور شفق کے غائب ہوجانے پر تھی تو اس کے متعلق یہی کہا جاسکتا ہے کہ عشاء کی وہ نماز جس کو مغرب کے ساتھ انھوں نے جمع کیا وہ غروب شفق کے بعد تھی اگرچہ وہ مغرب کی نماز شفق کے غائب ہونے سے پہلے پڑھ چکے ہوں کیونکہ وہ دونوں کو جمع کرنے والے اسی وقت ہوں گے جب تک وہ عشاء کو نہ پڑھ لیں۔ پس وہ اس طرح مغرب و عشاء کے جامع بن گئے اور ایوب کے علاوہ روات نے اس کو وضاحت سے بیان کیا ہے۔
ان دونوں روایات سے معلوم ہو رہا ہے کہ جمع حقیقی مراد ہے۔
الجواب نمبر ١: ایوب سختیانی کی موجودہ روایت میں یہ الفاظ ہیں فسار حتی غاب الشفق ثم نزل نافع کے کسی اور شاگرد نے یہ الفاظ نقل نہیں کئے یعنی عبیداللہ ‘ لیث ‘ مالک (رح) نے اور نہ ہی ابن عثمان (رض) نے جن سے ہم نے روایت نقل کی ہے گویا یہ روایت دوسرے روات کے خلاف ہے۔
نمبر ٢: ایوب نے جناب رسول اللہ (صلی اللہ علیہ وآلہ وسلم) کے فعل میں تو اس کا ذکر نہیں کیا البتہ عبداللہ بن عمر (رض) کی روایت میں اس کی خبر دی گئی ہے اور پھر جمع کی کیفیت بھی مذکور ہے کہ شفق کے غائب ہونے کے بعد دونوں کو جمع کیا۔ اور اس میں یہ کہنا بالکل ممکن ہے کہ انھوں نے مغرب کی نماز غیبوبت سے پہلے ادا کی اور عشاء کی نماز کو شفق کے بعد پڑھا ہو تو جمع بھی ہوگئی اور صوری ہوئی اور جواب نمبر ٢ اس کے ثبوت کا لفظ ایوب (رح) کے علاوہ دیگر روات کی روایات میں صاف موجود ہے۔
چنانچہ روایت اسامہ بن زید عن نافع ملاحظہ ہو۔