٩٥٢: عطاف بن خالد المخزومی نے نافع سے نقل کیا تھا کہ ہم ابن عمر (رض) کے ساتھ لوٹ رہے تھے کہ ابھی کچھ راستہ طے کیا تھا کہ آپ کو اپنی بیوی بنت ابی عبید کے متعلق اطلاع ملی تو آپ جلدی سے لوٹے یہاں تک کہ سورج غروب ہوگیا اور نماز کے لیے ان کو آواز دی گئی مگر وہ نہ اترے حتیٰ کہ جب گہری شام ہوگئی تو ہم نے گمان کیا کہ شاید بھول گئے تو میں نے کہا ” الصلاۃ “ اس پر خاموش رہے یہاں تک کہ شفق قریب الغروب ہوگیا تو اترے اور مغرب کی نماز ادا کی اور شفق غائب ہوچکا تو عشاء کی نماز پڑھائی اور فرمایا ہم جناب رسول اللہ (صلی اللہ علیہ وآلہ وسلم) کے ساتھ اسی طرح کرتے تھے جبکہ آپ کو جلدی سفر کرنا ہوتا تھا۔ یہ تمام روایات نافع سے یہ بتلا رہی ہیں کہ ابن عمر (رض) کا اترنا شفق کے غائب ہونے سے پہلے تھا اور ہم نے ایوب کی نافع سے منقول روایت کے لفظ ” حتی اذا غاب الشفق “ سے متعلق شفق کے قریب ہونے کا احتمال لکھا ہے۔ پس ان روایات کے متعلق سب سے بہتر بات یہ ہے کہ تضاد کی بجائے اتفاق پر محمول کیا جائے۔ پس ابن عمر (رض) کی روایت کا محمل شفق غائب ہونے کے قریب ہوا ‘ قرار دیں گے کیونکہ ان سے دوسری روایت میں غیبوبت شفق سے پہلے اترنا منقول ہے۔ اگر ان روایات میں تضاد ہو تو ابن جابر کی روایت ان میں زیادہ بہتر ہے۔ اس لیے کہ ایوب کی روایت میں بھی جناب نبی اکرم (صلی اللہ علیہ وآلہ وسلم) کا دو نمازوں کو جمع کرنا وارد ہے پھر انھوں نے ابن عمر (رض) کا عمل بھی یہی نقل کیا اور حضرت جابر (رض) کی روایت میں جناب رسول اللہ (صلی اللہ علیہ وآلہ وسلم) کی دو نمازیں جمع کرنے کا طریقہ بھی مذکور ہے۔ پس یہ زیادہ بہتر ہوگی۔ بالفرض اگر وہ کہیں کہ حضرت انس (رض) نے بھی تو جمع کی کیفیت تفصیل سے ذکر کی ہے جیسا کہ روایت آتی ہے ۔
اللغات : جدبناالسیر : اہتمام کرنا۔ جلدی کرنا تیز چلنا۔
تخریج : دارقطنی ١؍٣٧٩۔
حاصل روایات : یہ تمام روایات جو نافع سے منقول ہیں ان میں ابن عمر (رض) کا شفق کے غائب ہونے سے پہلے اترنا مذکور ہے رہی وہ روایت جو ایوب نے نافع سے نقل کی ہے اور اس میں حتی اذا غاب الشفق کے لفظ پائے جاتے ہیں اس کے متعلق ہم عرض کر آئے کہ اس میں دو احتمال ہیں۔
نمبر ١: بصورت تطبیق تو اس کا مطلب دوسری روایات کے مطابق قرب غروب شفق مراد ہے اس سے تمام روایات میں موافقت پیدا ہوجاتی ہے۔
نمبر ٢: دوسرا احتمال تضاد کا ہے تو پھر حدیث ابن جابر (رح) اس سے اولیٰ ہے کیونکہ حدیث ایوب (رض) میں ابن عمر (رض) کے جمع بین الصلاتین کی کیفیت مذکور ہے جبکہ حدیث ابن جابر اور ابن خالد (رح) کی روایت میں جناب رسول اللہ (صلی اللہ علیہ وآلہ وسلم) کے جمع بین الصلاتین کی کیفیت مذکور ہے اور وہاں جمع سے مراد صوری ہی ہے نہ کہ حقیقی۔
اشکال نمبر ٢: حضرت انس (رض) کی روایت میں جمع بین الصلاتین کی کیفیت مذکور ہے جو جمع کا حقیقی ہونا ظاہر کرتی ہے روایت یہ ہے۔