٩٥٣: ابن شہاب نے انس بن مالک (رض) سے اس طرح نقل کیا ہے کہ جناب رسول اللہ (صلی اللہ علیہ وآلہ وسلم) نے جس دن سفر کرنا ہوتا تو ظہر و عصر کو جمع فرماتے کہ ظہر کو اول وقت عصر تک مؤخر کرتے پھر دونوں کو جمع کر کے پڑھتے اور مغرب کو مؤخر کرتے یہاں تک کہ مغرب و عشاء کو جمع فرماتے یہاں تک کہ شفق غائب ہوجاتا۔ انھوں نے استدلال کرتے ہوئے کہا کہ حضرت انس (رض) کہتے ہیں کہ آپ (صلی اللہ علیہ وآلہ وسلم) نے ظہر و عصر کو عصر کے وقت میں ادا کیا اور آپ (صلی اللہ علیہ وآلہ وسلم) کے جمع کی یہی صورت تھی۔ پہلے قول والوں کے پاس ان کے خلاف یہ دلیل ہے کہ اس روایت میں یہ احتمال ہے کہ جمع کی صورت میں یہ زہری کا مدرج کلام ہو ارشاد نبوت (صلی اللہ علیہ وآلہ وسلم) نہ ہو کیونکہ وہ اکثر اپنے کلام کو حدیث سے ملاتا رہتا ہے یہاں تک کہ ناظر کو اس کے حدیث ہونے کا وہم ہوجاتا ہے اور دوسرا احتمال یہ ہے کہ : ” الی اول وقت العصر “ سے وقت عصر کا قرب مراد ہو۔ اگر اس روایت کا معنی دونوں میں سے کوئی ایک کیا جائے جس سے وقت عصر میں ظہر کی ادائیگی لازم نہیں ہوتی تو پھر اس روایت سے ان کی کوئی دلیل باقی نہیں رہتی جو یہ کہتے ہیں کہ آپ (صلی اللہ علیہ وآلہ وسلم) نے اس کو وقت عصر میں ادا کیا۔ اور اگر اصل روایت اس طرح ہو کہ آپ (صلی اللہ علیہ وآلہ وسلم) نے اسے وقت عصر میں ادا کیا ہے تو پھر اس سے دونوں کا جمع کرنا لازم آتا ہے تو اس سے یہ ابن عمر (رض) کی اس روایت کے مخالف ہوجائے گی جو ہم نے جناب نبی اکرم (صلی اللہ علیہ وآلہ وسلم) سے بیان کی اور اس سلسلہ میں حضرت عائشہ صدیقہ (رض) نے بھی ان کی مخالفت کی ‘ ان کی روایت یہ ہے۔
حاصل روایات : فریق اوّل کہتا ہے کہ اس حدیث سے معلوم ہو رہا ہے کہ آپ نے ظہر و عصر کو وقت عصر میں ادا فرمایا اور ان کو اسی طرح جمع فرمایا۔
الجواب مع الصواب :
فکان من الحجۃ سے دیا گیا پہلی بات تو یہ ہے کہ یہ روایت جمع حقیقی کی صورت میں نص قطعی ” ان الصلاۃ کانت علی المؤمنین کتابا موقوتا “ کے خلاف ہے نیز اس روایت سے تو اولیٰ ابن جابر اور ابن خالد کی روایت ہے جو نصوص کے مطابق ہیں۔
نمبر ٢: دوسری بات یہ ہے کہ جمع کی کیفیت خود زہری کا کلام ہو جناب پیغمبر (صلی اللہ علیہ وآلہ وسلم) کا کلام نہ ہو کیونکہ زہری اکثر اپنی وضاحت کو کلام رسول سے خلط کردیتے ہیں جس سے اس کا حدیث ہونا معلوم ہوتا ہے حالانکہ وہ تفسیر حدیث ہوتی ہے۔
نمبر ٣: آخری بات یہ ہے کہ الی اول وقت العصر کے الفاظ سے ” الی اقرب اول وقت العصر “ مراد ہو۔
اگر ان معانی میں سے کسی کو اختیار کرلیں تو وقت عصر میں ظہر کا پڑھنا لازم نہیں آتا اور اگر بالفرض وقت عصر میں پڑھنا مراد ہو تو پھر یہ روایت ابن عمر (رض) اور عائشہ (رض) کی روایت کے خلاف ہے۔